En 2005 l'Asambleya Cheneral d'a ONU designó lo 27 de chinero, calendata d'a liberación de Auschwitz, como Día Internacional de Commemoración en Memoria d'as Victimas d'o Holocausto y de Prevención de Crímens contra la Humanidat, con o proposito de recordar a totas las victimas d'o Holocausto y d'a persecución nazi y evitat presents y futuros chenocidios en as nuestras sociedaz.
Un anyo mas, la Plataforma d'Acción per la Memoria d'Aragón (PAMA) se suma a los actos y homenaches que, en este día, se celebran en memoria d'as victimas d'o holocausto.
“La ideolochía asesina d'uns pocos dirichents plegó a impregnar amplias capas socials d'hombres y mullers, que estioron elementos necesarios y la suya colaboración estió imprescindible pa levar a cabo la barbarie”, recuerdan dende PAMA, y subrayan “lo asesinato metodico, industrialment planificau, de millons d'hombres, mullers, ninos y ninas que lo nacionalsocialismo quereba excluyir d'a sociedat en estar consideraus periglosos per la suya diversidat: chodigos, opositores politicos, personas con discapacidat, masones, chitans, homosexuals, Testigos de Jehová, etc. Entre éls, los mas de 9.000 mullers y hombres espanyols republicanos deportaus a los campos nazis y cuantos milars mas obligaus a realizar treballo esclau en a industria de guerra d'o Reich, per la suya condición d'enemigos politicos de Franco y de Hitler y per la suya contribución a la luita contra lo ocupante alemán en Francia”.
Dende PAMA recuerdan con dolor y “especialment, a los mas de mil aragoneses y aragonesas, d'éls 650 exiliaus como consecuencia d'o triunfo franquista en 1939, que estioron deportaus entre 1940 y 1945 a los campos de concentración nazis”.
“Responder a lo mal ye lo que nos fa humans”
Dende a entidat recuerdan as parolas de Elie Wiesel: “La indiferencia debant d'o sufrimiento d'os de demás ye lo que convierte a lo ser humano en inhumano. Responder a lo mal ye lo que nos fa humans”
Seguntes o pareixer d'a entidat social “integrar la memoria d'o Holocausto y de totas las victimas d'o nazismo en as consciencias individuals y colectivas ha de servir pa conoixer dica án puede plegar la capacidat humana pa perpetrar lo mal y pa exercer lo bien y ha de convertir-se en arma poderosa frent a mensaches y insidias amenazadoras en epocas de crisi y inseguridaz”.
Per ixo, PAMA y las Asociacions Memorialistas que s'integran en a plataforma, treballa “pa difundir y explicar lo succediu dende lo convencimiento que la Memoria, Verdat, Chusticia y Reparación ye lo mas necesario pa evitar la repetición de sucesos como los que se conmemoran y, especialment, cuan somos vivindo l'auche d'organizacions faixistas”.
“En l'actualidat veyemos de contino como se vulneran os dreitos humans, como se sigue acazando a lo cual ye diferent, como s'imposan criterios ideolochicos sectarios y como tot vale pa fer prevaler unas ideyas u intereses excloents. Ye en este momento cuan hemos de tornar a mirar la historia, renegar d'ixas personas que facilitoron los chenocidios y represions y reivindicar a ixas personas, que luitoron pa que esta sociedat estase mas chusta y, sobre tot, mas libre”, concluyen dende PAMA.
