Manifiesto.- ¡Espanya se creba! Espanya, ixe enchendro chenocida y asesino de pueblos, ixa mentira repetida mil vegadas por reis, nobles y aristocratas, por burgueses codiciosos, por militars y mosens ta guaranciar a salvo os suyos intreses de clase, perpetuar a medrana y continar chusmeso a os pueblos y a as suyas treballaderas ha plegau a o suyo fin. Con o pretexto d’a unidat indivisible d’a patria s’ha negau sistematicament qualsiquier muestra d’identidat popular y s’ha imposau lo modelo d’a Espanya una gran y libre. Ista Espanya que durante sieglos ha iu cambeando de mans, d’austrias a borbons, de conservadors a liberals, de republicanos a faixistas, de populars a “”socialistas”” pero que en a practica ha suposau a continación d’un centralismo nacionalista espanyol racista y d’unas politicas liberals en contra d’a clase obrera; nos ha amostrau que un prochecto nacional espanyol ye incompatible con un cambeo de sistema social y economico más chusto por a mesma ideya y alazets d’o concepto d’Espanya.
Manimenos muitos s’empenyan en achugar encara hue por una Espanya chunta y progresista. Clamando a una suposada amillora social en contimparación con a dictadura y un proceso de transición que ha asegurau a democracia y a libertat en l’estau espanyol. ¡Nusatras as chovens decimos que ixo ye una mentira! No nos creyemos a suya falsa transición, os suyos pactos mal clamaus democraticos y os suyos consensos cusiraus bien aman por l’echercito y os camisas azuls y maquillaus por a cucha pactista y vendida que una vegada más traicionó a la clase treballadera. Tenemos esclatero que a transición estio una mentira más en a gran lista y que ya va estando hora de crebar con ista paz social aconseguida a base de dominación, de mentiras, de represión y de medrana y lograr a libertat d’os nuestros pueblos y d’as suyas treballaderas. Ista crisi no ye nomas economica. O capitalismo ha quedau viello pero tamién han caducau as institucions que lo administran y fan servir os nuestros países. O Rei y a suya familia de pegollas que guarancian a unidat de l’estau y continar a o rechimen, os politicos corruptos vendidos a o millor postor, os banqueros y empresarios que nomas piensan en enamplar a suya riqueza y negocian as traicions t’as treballaderas con os sindicatos amariellos. O sistema ha tornau a fallar, agora ye o tiempo d’s pueblos ta construyir l’alternativa de poder. Un poder que resida en mans d’as treballaderas y no en os que se enriquecen a nuestra costa. Un poder que sirva ta construyir un mundo nuevo, socialment más chusto y do no existan ni a explotación ni a discriminación de garra mena. Un poder d’o pueblo y t’o pueblo.
Y en isto continamos todas chuntas. Ye o mesmo estau que oprime a os nuestros pueblos y será a compleganza d’as nuestras fuerzas lo que destituirá o poder corrupto y opresor. Debemos estirar cadagun enta o suyo lau y trencar a tranca ta dimpues construyir cada pueblo dende a suya reyalidat y seguntes as suyas necesidatz. O proceso destituyente será común, pero os de construcción d’o poder popular se ferán dende cada pueblo por as suyas clases treballaderas.
Por ixo dende as chovenallas revolucionarias queremos nimviar tot lo nuestro refirme a o pueblo castellano –y más que más t’as companyeras de YESCA- en a movilización d’o 28 de setiembre de #Jaquealrey como materialización d’a luita por a destitución d’o poder estableixiu y l’avance decidiu enta l’autodeterminación de totz os pueblos y a emancipación d’a clase treballadera.
¡Todas chuntas dica estricallar o sistema y construyir en cada pueblo lo poder popular!
Sinyau: PURNA (Aragón), ARRAN (Països Catalans), ERNAI (Euskal Herria), BRIGA (Galiza), ADIANTE (Galiza), DARRÉU (Asturies), ISCA! (Galiza), JALEO!!! (Andalucía).
