Espiello Agora X l’aragonés ye una sección que naixió con l'obchectivo de dar cullida en o Festival a toz aquels treballos realizaus en aragonés. En a XXI edición de Espiello, la gala “Agora X l’aragonés” se celebrará en o cabo de semana previo a l'inicio d'o Festival, lo sabado 9 de marzo.
Ixe día, tota la programación previa de Espiello se centrará en a sección Agora X l’aragonés. Per lo maitín se prochectarán los cuatro treballos presentaus a la categoría escolar, plegaus d'o CRA Alto Ara, d'o CEIP San Juan d'a Penya de Chaca, d'o colechio Salesianos de Uesca y d'o CEIP Virchen d'os Ríos de Caldearenas. La categoría cheneral ha recibiu seis treballos, que tamién se prochectarán lo día 9 de marzo en o Palacio de Congresos de Boltaña. En este caso, son obra d'os directors y directoras Agustín Monllor, Silvia Orós (que ganó lo premio Espiello Agora X l’aragonés en 2023 con o treballo “Casa mía, casa tuya”), Carlos Baselga y Francisca Martín (tamién ganadors con “Ai Dios!” en 2022), Juan Antonio Peñalver y Lola Gracia Sendra, amás d'un títol endrezau a lo publico infantil y doblau a l'aragonés per l'Asociación Cultural Nogará Religada.
En esta edición, Espiello han recibiu cuatro treballos en a categoría escolar que plegan toz de centros d'as comarcas altoaragonesas. "Son treballos escolars realizaus en as clases d'aragonés. En a categoría cheneral somos acostumbraus a una gran variedat tematica y de cheneros y este anyo ye mayor ixa variedat, con documentals de ficción y atros que charran d'a luenga y un zaguer largometraje d'animación doblau a l'aragonés", explica Patricia Español, directora de Espiello.
La chornada dedicada a los treballos en aragonés concluyirá con a gala d'entrega de premios, conducida en aragonés per la presentadora televisiva Silvia Cebolla y amenizada per lo grupo musical Nuei, integrau per músicos de gran experiencia en bandas de Zaragoza y que combina lo pop con o reggae, la cumbia u lo rock, con letras en aragonés.
Lo churau d'este premio ye formau per Quino Villa, María Luisa Arnal y Francho Marcen. "Tres referents en l'ambito d'a luenga aragonesa, que tendrán la labor de fallar los premios Agora X l’aragonés", explican dende la organización. Uns premios que conceden una experiencia ludico-educativa valorada en 500 euros y trofeo en a categoría escolar y 900 euros y trofeo en a cheneral.
Listau de treballos presentau a los premios Espiello Agora x l’aragonés
Categoría escolar:
- Baixando t’a escuela - Andrés Valero Ubieto, CRA Alto Ara
- Pende de ros 2 - Mirian Aranda Monteagudo, CEIP San Juan de la Peña de Chaca
- O fiero Zaborrero - Luis Machuca y Jesus Botaya, Salesianos Uesca
- En a nuei d ‘as almetas - Pili Ibañez, CEIP Virgen de los Ríos de Caldearenas
Categoría cheneral:
- Albert - Karsten Kiilerich. Doblau a l'aragonés per Asociación Cultural Nogará Religada, Sonilab Studios
- Os charrines ¿Do i son as cosas? - Agustín Monllor: enguero mundial
- Batimento - Silvia Orós Daga: enguero mundial
- En o corazón d’as luengas: los fablans - Juan Antonio Peñalver Bergua,
- ¿Ye la vida en os lugars una opción rial? - Carlos Baselga Abril y Francisca Martín Mauri: enguero mundial
- Luz de setiembre - Lola Gracia Sendra
