Lo president d'a Comarca d’o Somontano de Balbastro, Saúl Pérez Lacasa (PP), y los alcaldes d'os concellos de Alquezra, Bierxe, Colungo-Asque, A Luenga, Adauesca, Santa María de Dulcis, Estadilla, Peralta d'Alcofeya, Pozán de Vero, Castillón d'o Puent, Castillazuelo, Berbegal y Salas Altas, han sinyau senglos convenios “pa la restauración de catorce elementos patrimonials vinculaus a la gastronomía y la producción agricola y ganadera, como fuents, pozos, balsas u molins, en os cuals, amás d'adecuar lo espacio, se crearán cubillars pa la fauna y la flora”.
Las actuacions incluyen medidas d'integración ambiental endrezadas a proporcionar a la flora y la fauna y acceso a lo recurso común, l'augua, per medio d'a construcción de rampas y abrevaderos, asinas como a amillorar la suya hábitat sembrando especies con flor y plantando atras autoctonas pa crear islas de biodiversidat y instalando hotels d’insectos u islas sobre las albercas pa crear nuevos cubillars.
Lo president d’o Somontano explica que la esleción d'os elementos patrimonials d'esta acción d'o Plan de Sostenibilidad Turistica Saborea Guara Somontano s'ha realizau atendendo a las propuestas presentadas per los consistorios. “La respuesta estió muito buena, con 51 propuestas presentadas per 18 concellos, que lamentablement, per las limitacions presupuestarias, no podemos contemplar en a suya totalidat. Atendendo a criterios turisticos, triamos 25 d'ellas y encargamos senglas memorias valoradas que detallan las actuacions necesarias. Dimpués d'analisar la viabilidat d'a suya execución y tenendo en cuenta lo presupuesto d'o cual se disposa, que asciende a 180.000 euros, s'ha achugau per executar un total de catorce obras repartidas per tota la redolada”, apunta.
Las medidas d'integración ambiental formarán parte d'os treballos d'acondicionamiento, sinyalización y interpretación d'a noria de Castillón d'o Puent, lo pozo-fuent de Lagunarrota, la fuent Dos canyos de Pozán de Vero, lo Pozo La sal de Estadilla, la caseta de Babalú de Salas Altas, la fuent Mochirigüel de Alquezra, l'entorno de l'antigo molín d'aceite de Radiquero, lo pozo salau de A Luenga, las restas arredol d’o molin d'aceite de Castillazuelo, lo lavador municipal de Colungo, l'antigo molín d'Os Corrales de Buera, la fuent La Cantariella de Adauesca, la balsa Caracruz de Bierxe, y la fuent de Santo Gregorio de Berbegal.
Pérez mete l'accento en a importancia de plegar a un numero tan elevau de localidaz d'o territorio, a traviés de “chicotas actuacions que sumadas suposarán una important puesta en valor y recuperación d'estes elementos patrimonials d'a comarca”, y que s'unen a atras actuacions d'o Plan de Sostenibilidad Turistica Saborea Guara Somontano con as cualas s'ha plegau a unatra docena de concellos.
L'alcalde de Santa María de Dulcis, Mariano Lisa (PSOE), destaca la importancia de prochectos d'esta naturaleza, que “aduyan a poner en valor la cultura y lo patrimonio d'os nuestros lugars, revalorizando los suyos productos”.
Las memorias valoradas d'aquellas actuacions que la entidat comarcal finalment no executará han estau entregadas a los respectivos concellos pa que puedan materializarlas a traviés d'os suyos propios meyos u utilizar-las pa atras solicituz de subvención, mientres que las actuacions replegadas en os convenios sinyaus se licitarán en as proximas semanas.
Lo Plan de Sostenibilidad Turistica Saborea Guara Somontano, pa lo cual la Comarca d’o Somontano de Balbastro conta con un millón d'euros financiaus per los fondos Next Generation, s'articula a traviés de cuatro eixes: transición verda y sostenible, eficiencia enerchetica, transición dichital y competitividat, con l'obchectivo de reforzar las valors turisticas d'a comarca, metendo lo foco en a enogastronomía.
