Las organizacions d'o ret “Gas No ye Solución”, en o cual se troba Ecolochistas en Acción, han presentau alegacions formals debant d'o Ministerio pa la Transición Ecolochica y lo Reto Demografico “contra los tramites d'información publica actualment ubiertos pa los diferents tramos d'o prochecto ‘Infrastructura Interior d'Hidrocheno’ en lo Estau espanyol, incluyius en o Ret Troncal espanyola d'Hidrocheno y en o corredor H2Med”. Lo ret exiche “la paralización immediata d'os tramites mientres no s'aprebe un traste lechislativo que permita una Evaluación Ambiental Estratechica (EAE) adecuada de toz los plans y programas asociaus”.
As entidaz denuncian que lo ret de transporte d'hidrocheno “empentau per Enagás a traviés d'os suyos filials, carece d'a planificación ambiental exichida per la lechislación vichent, como sí ocurre con o ret de transporte electrico”. “Somos debant d'una infrastructura altament interrelacionada que afecta a diferents territorios y recursos de traza acumulativa y que, manimenos, se ye tramitando per tramos aislaus y sin una visión global y estratechica”, indica Marina Gros Breto, coordinadora de l'Aria d'Enerchía d'Ecolochistas en Acción y portavoz d'o ret.
Entre los argumentos esgrimidos lo ret subraya lo escaso desembolique actual d'o mercau de l'hidrocheno en o Estau espanyol (tasament 33 MW d'electrolizadores operativos) frent a las procheccions desmesuradas de dica 74 GW incluyidas en os escenarios d'o promotor, que la suya finalidat prencipal sería la exportación d'hidrocheno renovable enta los estaus francés y alemán a traviés d'o corredor H2Med. Esta expansión requeriría instalar decenas de GW adicionals de cheneración renovable exclusiva, con serias implicacions pa lo territorio y los ecosistemas.
Lo ret denuncia asinasmesmo que la iniciativa “ye sostenida con fondos publicos, sin que s'haiga contrimostrau la suya viabilidat ni la suya aporte real a la descarbonización”. “Somos asistindo a un nuevo caso d'inchección de diners publicos a infrastructura privada con enormes risgos an se substituye la planificación democratica y ambiental per un modelo dictau per l'oligopolio enerchetico”, subraya Francisco del Pozo, responsable de combustibles fósiles y nuclear de Greenpeace y portavoz d'o ret.
“Ye primordial un cambio en os modelos de producción, consumo y hábitos”
Lo ret reconoixe que l'hidrocheno verde, y los suyos derivaus “ye clamau a desempeñar un rol important en o proceso de descarbonización de bels sectors difícils d'electrificar como cualques industrias, como la siderurchica, maquinaria pesada u lo transporte marítimo y aerio”. Manimenos, no pueden descarbonizarse toz los usos actuals y futuros d'estes sectors, especialment en o sector industrial y de transporte “ye primordial un cambio en os modelos de producción, consumo y hábitos pa reducir las necesidaz de transporte de pasachers y mercaderías de largas distancias. Ye fundamental una analisi estratechica de l'impacto de ditas infrastructuras de producción, de transporte y de las plantas renovables asociadas, que de conchunta con estudeyo de la demanda actual y futura d'hidrocheno verda promueva la infrastructura d'hidrocheno realista que afavoreixca la rapida descarbonización minimizando l'impacto en os territorios an se quieran implantar”, recalcan.
En as suyas alegacions, las organizacions ecolochistas reclaman no nomás l'Avaluación Ambiental Estratechica pa lo conchunto d'o ret troncal “sino tamién una Avaluación d'Impacto Ambiental Ordinaria completa pa cada tramo que tienga en cuenta las afeccions sinérgicas y acumulativas”. Advierten que “lo fraccionamiento d'o prochecto podría estar vulnerando la lechislación europea, que obliga a considerar los impactos acumulaus d'infrastructuras como las grans conduccions d'hidrocheno”.
Pa la Federación Aragonesa d'Ecolochistas en Acción “no se puede charrar de transición enerchetica sin ordenar usos d'o goso, avaluar impactos globals y guarenciar participación ciudadana”. En ixe sentiu, reclaman “una transición verdaderament democratica, descentralizada y socialment chusta, an las decisions estratechicas se prengan con información transparent, participación efectiva y avaluación ambiental rigorosa”, rematan.
