La celebración d'o Día Internacional d'a Luenga Materna en Zaragoza, que los suyos actos institucionals s'abanzoron a lo viernes 20 de febrero en coincidir la calendata oficial, 21 de febrero, en sabado, ha serviu este anyo “pa plantiar una reflexión sobre una cuestión estratechica pa lo futuro d'as luengas minorizadas, como ye la suya presencia en l'audiovisual y en as plataformas de streaming”, subrayan dende lo REA.
La chornada, organizada per lo Rolde de Estudios Aragoneses (REA) en colaboración con a Deputación de Zaragoza (DPZ) y con a participación d'a Fundación Caja Rural, contó con a presencia de Alessandro Pisu, CEO de MyCulture+, plataforma especializada en obras audiovisuals en luengas y culturas minoritarias.
“En un contexto global marcau per lo consumo masivo de contenius dichitals y baixo demanda”, dende lo Rolde de Estudios Aragoneses se considera prioritario “afianzar la presencia d'as luengas minoritarias en o conchunto d'a cadena audiovisual, con atención a la creyación y la producción, pero tamién a la distribución”.
“D'ixo depende que las nuestras luengas no queden relegadas en os entornos an hue se concentra l'acceso a la cultura y que, a lo mesmo tiempo, puedan ubrir-se nuevas vías de circulación de contenius y de plegada a nuevos publicos”, aseveran.
Seguntes o pareixer d'o REA “la visita de Alessandro Pisu y las conversacions mantenidas con motivo d'esta celebración, han suposau una primera prene de contacto muito positiva pa las luengas d'Aragón”.
“L'intercambio, realizau en un clima d'interés y colaboración, ha ubierto una linia de treballo con MyCulture+ y ha permitiu alcordar la incorporación progresiva de mas de 40 piezas audiovisuals en aragonés, orichinals u subtituladas. La plataforma preveye amás habilitar un espacio propio pa esta luenga, un nuevo paso que afavoreix la suya prochección en dialogo con atras comunidaz lingüisticas”, destacan dende la entidat.
Lo Rolde de Estudios Aragoneses valora “muito positivament esta chicota conquiesta, ya que asinas se da respuesta a una cuestión que dica agora tasament trobaba salida: contar con un espacio propio en una plataforma especializada permite empecipiar a treballar con mayor estabilidat y con un horizont de difusión mas amplio pa l'audiovisual en aragonés”.
“Amás, esta colaboración ubre una relación de treballo con atras experiencias europeas que s'enfrontinan a retos semellants, tanto en o plano audiovisual como en cuestions sociolingüisticas relacionadas con a transmisión intercheneracional u lo prestichio social d'a luenga”, subrayan dende lo REA.
Finalment, sinyalan que “la celebración d'o Día Internacional d'a Luenga Materna deixa asinas una chornada muito satisfactoria y, sobre tot, productiva. Ha permitiu establir nuevas relacions internacionals, reforzar la presencia d'as nuestras luengas minoritarias y dotar-las de nuevas ferramientas y visibilidat. A lo mesmo tiempo, afavoreix lo dialogo con atras luengas y ubre la puerta a futuras colaboracions”, concluyen dende lo Rolde de Estudios Aragoneses.
