Lo pastoreo y l'actividat agroalimentaria d'os lugars de Sobrarbe tornarán a estar protagonistas en una nueva edición d'a Ferieta de L’Aínsa, que torna a la Villa Medieval d'o 30 de chinero a l'1 de febrero.
La cita se remonta a lo sieglo XI y vive d'anyo en anyo una constant adaptación a los tiempos, pues sin perder de vista lo producto de kilometro zero y la labor d'artesanas, ganaders y agricultors comarcals, aculle tamién la presentación de nuevos prochectos como l'hortal comunitario de L’Aínsa u una actividat teatralizada pa amanar lo pastoreo a lo publico familiar.
En esta ocasión, lo programa prencipia lo viernes 30 de chinero. “Tendremos a Lucía López Marco, coordinadora en Aragón d'a ONG Justicia Alimentaria, presentando lo suyo zaguer libro, 'Nosotras somos semillas', y dimpués prochectaremos lo treballo 'Voces invisibles del campo', un audiovisual que nos convida a mirar de frent las condicions de vida y treballo d'as personas migrants que plegan a Europa a treballar en l'agricultura”, explica la concellera y directora d'a feria, Susana Pérez. Dimpués de finalizar, s'ofrirá una degustación de productos de Sobrarbe.
Ya lo sabado, en a carpa d'o Castiello, la Feria d'a Trufa brindará la ocasión d'adquirir esta deliciosa retacía u prebar tapas elaboradas con o mesmo. Per unatro costau, se producirá la recepción d'animals, protagonistas en una cita de carácter ancestral, encara que con l'ausencia d'o bestiar vacuno y porcino (l'autoctono latón d'A Fueva) per l'actual situación sanitaria. La Corrida d'a Ferieta se desenvolverá en o parking d'o Castiello entre lo maitín y, per la tarde, s'entregarán los Premios Cruz de Sobrarbe, que en a suya docena edición homenachearán a lo recientment chubilau secretario d'o Concello de L’Aínsa-Sobrarbe, Pedro Larramona, y a la Fundación pa la Conservación d'o Quebrantahuesos. Tamién, y a títol postumo, a la directora d'o Parque Nacional d'Ordesa y d'as Tres Serols -Parque Nacional de Ordesa y Monte Perdido, en castellano-, Elena Villagrasa.
Ixe mesmo día se succederán distintas charradass en a torre de l'homenache. La presentación d'o libro 'Comiendo el mundo, llega el cambio', d'o director gastronomico d'o Centro d'Innovación Gastronomica d'Aragón, Ismael Ferrer, lo prochecto d'hortal ecolochico municipal y lo coloquio-degustación de productos de proximidat coparán l'achenda dica lo meyodía. Per la tarde, y dimpués de la entrega d'os premios Cruz de Sobrarbe, se celebrará una mesa redonda an empresas agroganaderas, treballadoras d'entornos naturals y asociacions d'o territorio charrarán d'a importancia y la relación entre lo sector primario y lo meyo ambient. Como zarre a la chornada, que marcará lo punto de partida d'un cabo de semana repleto d'actividat, i habrá una gran foguera y una longanizada popular en a Plaza Mayor.
Lo día gran d'a Ferieta
Lo domingo 1 de febrero los puntos d'interés se repartirán entre lo Castiello y la Plaza Mayor de L’Aínsa. Allí lo publico, como ye habitual, trobará puestos d'artesanía, embutidos, repostería, lácteos, miel u antiguidaz, no nomás de Sobrarbe, sino de tot Aragón y tamién d'as vecinas vals bearneses. La infancia podrá dar paseos en poni y participar en os tallers de trenau de cuerdas, mientres que pa las personas intresadas en o sector ganadero se celebrará lo tercer concurso popular pa triar a lo millor eixemplar d'ovino y caprino. Entre los votantes se sortiará una cesta de productos agroalimentarios de Sobrarbe.
“Como novedat, hemos introduciu en o programa una actividat teatralizada sobre pastoreo pa lo publico familiar, 'La abuela Marcelina y su nieta pastora', que se desenvolverá entre lo maitín d'o domingo. Animamos a acudir, tamién, a lo paseo-explicación morfolochica racial de bestiar, y a degustar lo guiso de vetiella Roya-Pirenaica. Tot ixo pa seguir dando visibilidat a los nuestros ganaders y a la labor tan imprescindible que fan pa mantener vivos los nuestros lugars”, subraya Susana Pérez, directora d'a Ferieta.
Mas d'una veintena d'actividaz en tan nomás cuatro días salen adebant con a colaboración de personas voluntarias d'o municipio, treballadors d'o concello, entidaz y asociacions locals y lo patrocinio d'o Ministerio pa la Transición Ecolochica y lo Reto Demografico, d'o Gubierno d'Aragón y d'a Deputación de Uesca. La suya enchegada contribuye, asinasmesmo, a lo complimiento de cuantos Obchectivos de Desembolique Sostenible como la promoción d'a producción y lo consumo responsables (12) y la creyación de comunidaz sostenibles (11).
“La Ferieta ye l'evento estrela de l'hibierno, y asperamos contar con a presencia de vecins y vecinas de tot Aragón, asinas como de visitantes d'atros territorios que en estes días se troben desfrutando de l'encanto de l'hibierno en Sobrarbe. Asperamos que sía fuent de conoixencia y una nueva oportunidat pa aproximar a lo publico a un sector economico primordial en o campo y en a ciudat”, concluye Susana Pérez.
