L'alcalde d'a localidat, Sergio Pueyo, explica que “estar a tan nomás 3 kilometros d'o capitero comarcal atraye turistas entre tot l'anyo, ye una zona muito transitada per senderistas, ciclistas, cazadors y buscadores de setas. Yera necesaria esta actuación”. Amás d'a pavimentación de totas las carreras “tamién s'ha creau un nuevo aparcadero pa vehíclos, pa los visitantes, pero tamién pa los vecins d'O Soto y de tot lo municipio”.
Las obras, que han contau con financiamiento d'a Deputación de Uesca a traviés d'o Plan d'Obras y Servicios de 2024, han suposau una inversión superior a 60.600 euros. “De cara a 2026, tenemos planificau bella cosa semellant en San Lorién”, nuclio ubicau a 7 kilometros d'O Pueyo d’Araguás. “Cada anyo levamos a cabo actuacions en un nuclio de población, bien con recursos propios u bien con la aduya d'atras institucions. Lo nuestro proposito ye que los nuestros vecins y vecinas, vivan an vivan, desfruten d'as suyas poblacions y de l'entorno y quieran seguir desenvolvendo aquí los suyos prochectos vitals” sinyala Pueyo.
En este sentiu, lo primer edil d'O Pueyo d’Araguás considera que “la depuración d'auguas ye bella cosa esencial en pleno sieglo XXI, encara tenemos problemas de fornimiento en cualques lugars d'o municipio y somos treballando pa solucionarlos pa afavorir l'asentamiento de población. Levamos ya mas de dos anyos y meyo con a depuradora d'O Pueyo funcionando, estió una d'as primeras en construyir-se en tot lo Pirineu aragonés, y somos treballando en a de Torrelisa con l'obchectivo que lo proximo anyo sía ya a pleno rendimiento. Amás, tenemos ya prochectadas las depuradoras de Oncins y d'Os Molins, totas dos en fase de prochecto. Asperamos prencipiar estas obras en 2026”.
Precisament en Oncins, muito proximo a lo Monesterio de Sant Veturián, lo consistorio concluyió lo pasau mes de febrero las obras de construcción d'un gran depósito d'augua potable, con una capacidat de 300.000 litros d'augua, pa guarenciar lo fornimiento a este nuclio de población y tamién la disponibilidat d'os caudales contra incendios, ya que s'ubica en una zona d'alta montanya con formacions boscosas de carrasca y caixico que ya sufrió un fuego voraz de grans dimensions en chulio de 2024 que arrasó mas de 150 hectarias.
