Lo Sindicato Obrero Aragonés (SOA-STA), a traviés d'a suya ‘Aria d’Ensinyanza’, denuncia “nuevament, lo grieu incomplimiento d'o Gubierno d'Aragón en relación con a ensenyanza d'a luenga aragonesa” y exiche “solucions immediatas”.
Dende lo SOA recuerdan que “como ya denunciamos, dende 2017 no s'han ubierto ni actualizau las listas de profesorado de Secundaria con perfil en luenga aragonesa, tot y que la lei obliga a una rebaremación cada tres anyos”. “Ueito anyos dimpués, la lista ye vueda y desfasada, lo que nomás permite cubrir una de cada tres plazas ofertadas. Esto suposa un fraude de lei y un desprecio enta la nuestra luenga y enta qui la amuestran”, subrayan.
Negación gubernamental d'o dreito a recibir clases d'aragonés
Lo sindicato SOA-STA entiende que as consecuencias d'a inacción d'o Gubierno d'Aragón “son claras: lo alumnado pierde lo suyo dreito a recibir clases d'aragonés. Y docents con titulación oficial quedan difuera d'as listas y no pueden optar a las plazas”.
Asinasmesmo, sinyalan que “la situación en o Cuerpo de mayestros tampoco millora: en os dos zaguers cursos quedoron vacantes sin cubrir perque la lista sigue zarrada y sin actualizar”.
La Chusticia d'Aragón requiere información a lo gubierno
“Agora, dimpués d'a nuestra denuncia, y la falta de respuesta per parte d'a DChA, la Chusticia d'Aragón ha confirmau per medio de comunicación oficial que ha requeriu a lo Departamento d'Educación, Cultura y Esporte un informe sobre esta situación y ha recordau a la DChA la suya obligación legal de colaborar con esta institución”. “Amás, la Chusticia ha anunciau que, malas que dispose d'a información reclamada, tornará a meter-se en contacto con SOA-STA”, detallan dende lo sindicato.
“Lo Gubierno d'Aragón incumple las suyas propias leis”
Per tot ixo, dende lo sindicato SOA-STA exichen a lo Gubierno d'Aragón “la apertura immediata tanto d'as listas de mayestros como profesors de secundaria de luenga aragonesa. La rebaremación urchent d'os méritos en Secundaria. Y que se guarencie la regularidat d'estes procesos como en a resta d'especialidaz”.
“Lo Gubierno d'Aragón ye incomplindo las suyas propias leis y condenando a la luenga aragonesa a la invisibilidat en as aulas. La intervención d'a Chusticia d'Aragón evidencia que no se trata nomás d'una denuncia sindical, sino d'un problema institucional grieu”, enfatizan.
Finalment, SOA-STA asegura que seguirá “luitando pa que la luenga aragonesa tienga lo espacio que mereixe en a educación publica aragonesa”.
