La DChA activará este domingo, dende las 8:00 horas, lo Plan Especial de Protección Civil per Fenomenos Meteorolochicos Adversos (PROCIFEMAR) en fase d'alerta, debant d'a previsión de nevadas y cheladas asociadas a la borrasca Francis “y las posibles afeccions que pueda chenerar en carreteras, municipios y servicios de distintos lugars” d'o nuestro país.
L'activación se produz en un contexto d'elevada incertidumbre meteorolochica, seguntes advierte l'Achencia Estatal de Meteorolochía (AEMET), que preveye que la borrasca pueda dentrar en Aragón a partir d'este domingo, afectando inicialment a lo Pirineu y a lo Sistema Iberico, con avisos amariellos per nevadas y cotas que podrían situar-se entre los 500 y 700 metros, y extendendo-se a partir d'o luns a amplias zonas d'o territorio aragonés.
Lo luns 5 de chinero podría estar la chornada mas adversa d'o episodio, con a posibilidat que la nieu alcance cotas baixas, especialment en o este y lo sud d'Aragón, encara que per lo momento no s'asperan grans acumulacions. Lo episodio tendería a remitir progresivament a partir d'o martes, si bien la evolución final contina estando incierta.
A este escenario se sumará un descenso acusau d'as temperaturas, con cheladas cheneralizadas entre los días 5 y 6, que podrían estar moderadas u localment fuertes en zonas de montanya, lo que podrá provocar la formación de placas de chelo y atras afeccions asociadas a lo fredo, especialment en carreteras y zonas urbanas.
“Debant d'esta situación, Protección Civil d'Aragón se mantiene en vichilancia permanent, en coordinación con a AEMET y la resta d'organismos implicaus. Asinasmesmo, lo Gubierno d'Aragón s'ha puesto en contacto con os presidents d'as tres deputacions provincials y ha enchegau la coordinación con as comarcas que pueden resultar afectadas, con l'obchectivo d'abanzar posibles afeccions y guarenciar una respuesta conchunta y eficaz”, aseguran dende la DChA.
De forma paralela, la Dirección Cheneral de Carreteras y Infrastructuras ha reforzau “lo dispositivo de vialidad hibernal, que conta con 65 quitanieves y mas de 150 profesionals, incorporando equipos adicionals en a comarca d'o Matarranya, la Val de Benás —con especial atención a la carretera A-139—, l'entorno de Formigal y la Plana de Uesca, lo que eleva dica 74 lo numero total de maquinas disponibles”.
“Amás, lo personal d'o dispositivo abanzará l'inicio d'a suya chornada a las 5:30 horas, con a finalidat de guarenciar lo mantenimiento d'as vías aragonesas dende primera hora. Este reforzo podrá enamplar-se si la evolución meteorolochica asinas lo requiere”, apuntan dende l'executivo aragonés.
Finalment, lo Gubierno d'Aragón insiste “en a importancia de mantener-se informaus a traviés d'as canals oficials, extremar la prudencia y seguir as recomendacions de Protección Civil, especialment en as zonas de montanya y en aquels desplazamientos que puedan veyer-se afectaus per la nieu, lo chelo u las baixas temperaturas”.
