Lo fanzine en aragonés “Güesque, la voz que fa creyer las béstias” torna e presenta lo suyo tercer numero este sabato a las 20h en lo Casal A Enrestida (Zaragoza). Pasa un anyo dende que publicon lo numero 2 perolo grupo que s’asedica a editar e fer lo fanzine nos recorda -como siempre fa en la suya editorial- “que no ha pasato si que un mes per lo que no cal estar niquitosos”. En esta ocasion, lo resultato pareix més un libret que no un fanzine “més gordo e récio que antes e como siempre con un rabanyo de debuixos de qualidat qu’acompanya a es textos”.
Tras trayer-nos “la traduccion d’o prencipe d’a Odisea, lo primer dia d’a Guerra u parlar-nos d’a literatura oral pasamos a histórias kalimocheras, de conciertos punks u yayos que se fevan la ruixadeta siempre con la boina mesa pero sigue donando-nos traduccions de gran nivel e acercando-nos la mitologia aragonesa seguindo lo fil de Golagutan u las Moras vistas en los anteriors exemplars”.
Tornan a decir que, este fanzine, “ye feto con buena cosa carinyo e amor a la lengua, a la suya diversidat e a las personas que deciden d’aprender a parlar-la, a qui se dirigen principalment, pa que tiengan la oportunidat de leyer sobre tot, un complemento a la literatura hegemonica en aragonés que nos conta la vita d’antes més en los lugars de l’Alto Aragon ufrindo-les uns modelos d’aragonés a saber que cudiatos e pulitos”.
Güesque! nos convida a ir “a la tardada d’o sabato a disfrutar d’a presentacion d’o tercer fanzine” que fan, aprofitar “pa fer la parola en aragonés e crompar-lo per només 5€”. Amés amés avançan que “d’aquí a poco tiempo se’n fará una altra presentacion a Graus, pa portar este material a zonas on l’aragonés encara ye la lengua vehicular pa una part d’a poblacion”.
