Lo documental “21.000 Palabras (Un capezuto e dos collons)” s'ha alzau con o Premio a Mejor Largometraje Documental Internacional en o Evolution Mallorca International Film Festival. “Súper contentos. Que la nuestra cinta compita con historias y produccions internacionals en festivals tan potents ye ya pa sentir-se muito orgullos, pero ganar... guau! Muito felices y agradeixius a lo churau y a lo festival. Esto ye benzina d'a buena pa Ánchel y pa lo belsetán -variant d’o aragonés d’a Val de Bielsa-”, explicaba Maxi Campo, lo director, sobre l’escenario d'o Teatro Prencipal de Palma en recibir lo gualardón.
Lo premio se suma al que la cinta obtenió en a mesma categoría y denominación a primers de mes en o Festival Internacional de Cine Villa de Ledesma (Salamanca). “Levamos dos hitos cuasi seguius, Ledesma y Mallorca, quí de nusatros habría imachinau un ranque asinas? Yo, prou que no. Ye muito complicau que ocurra, somos afortunaus. Cómo m'habría feito de goyo recibir este tamién en companyía d'Ánchel Lois!”, remataba Campo.
En esta ocasión, Ánchel Loís Saludas “Barré”, lo protagonista d'a cinta, no ha puesto viachiar dica Mallorca y asistir a la gala pa replegar lo premio, pero les ha agradeixiu dende Espierba lo gualardón: “Gracias per la reconoixencia a la nuestra cinta y a las valors que ella represienta, prencipalment lo de meter en valor la luenga d'a nuestra val y, per extensión, d'atras vals aragonesas. Una luenga que ha estau tan maltratada y que encara hue ye muito maltratada per los organismos oficials. Sisquiera la cinta sirva de revulsivo. Soniar ye libre. Mil gracias de nuevo. Seguiremos adebant, siempre”.
Qui sí ha viachiau tanto a la prochección como a la entrega d'o premio ha estau José Ángel Delgado, responsable de Cosmos Fan, productora que distribuye lo documental. “Estar y ganar este festival ha estau una experiencia fantastica que reforza cuantas d'as nuestras ideyas: que la cinta tiene gran valor per la preservación y defensa d'o patrimonio immaterial d'Aragón, que connecta con o publico per tratar-se d'una historia cuasi quijotesca y que se valora lo romanticismo d'a obra, tanto d'o suyo propio protagonista, Ánchel Lois, como d'o suyo director Maxi Campo”, afirmaba.
La cinta conta como Ánchel “Barré”, pastor y vecino de Espierba (Pirineu aragonés), leva 47 anyos redactando un diccionario con o proposito de salvar la luenga d'a suya val, lo belsetán -variant d’o aragonés d’a Val de Bielsa-. Acompanya la historia la suya nonagenaria mai Generosa Bernad y l'ilustre y cuasi centenario vecino de Bielsa Jesús Garcés Baitico.
Lo documental (que disposa amás d'un fichero sonoro inedito dica la calendata y d'a narración d'un conto exclusivo y animau) aprofita la ocasión pa contextualizar pasau, present y futuro tanto d'o belsetán en particular, como d'o aragónes en cheneral.
La cinta tamién ha formau parte d'a selección oficial d'o Minority Languages International Film Festival City of Spilimbergo y d’o València Indie Film Festival 2025.
“21.000 Palabras (Un capezuto e dos collons)” ha contau con o suporte de Queridas Produccions, la colaboración d'o Gubierno d'Aragón, la participación d'Aragón TV, y l'emparo final d'o Concello de Bielsa, de l'Asociación cultural Nogará-Religada y d'un buen numero de mecenas particulars.
