Lo Consello de Salut de Zona de L’Aínsa ha solicitau a lo Gubierno d'Aragón “que se mantienga la plaza d'Enfermería Familiar y Comunitaria (EFYC)” dimpués d'a restructuración anunciada per l'executivo d'Azcón lo pasau 5 de setiembre. Dita restructuración se traduz “en l'asignación d'estas plazas especializadas per cupos, no plegando-se a lo minimo pa lo suyo mantenimiento en L’Aínsa y suposando la suya desaparición lo proximo 16 d'octubre, calendata d'a fin de contracto d'a persona que compliba, dende feba tres anyos, esta función”, subrayan.
Dimpués d'a suya zaguera sesión, lo Consello ha ninviau una carta a lo consellero de Sanidat d'a DChA, José Luis Bancalero, emparada per os Servicios Socials d'a Comarca de Sobrarbe y la Residencia de Mayors La Solana “solicitando que se reconsidere la decisión”. A lo Consello de Salut ha acudiu tanto personal sanitario d'o Centro de Salut de L’Aínsa como vecins y vecinas d'o lugar y d'atras localidaz sobrarbenses, asinas como representants politicos d’a redolada, María Labarta, directora d'Atención Primaria d'o sector de Balbastro, y Ana López, directora d'Enfermería d'Atención Primaria.
La presidenta d'o Consello de Salut de Zona de L’Aínsa y concejala de Servicios Socials, Igualdat y Participación Ciudadana d'o concello, Susana Pérez, ha transmitiu a las directoras la suya preocupación per la perda d'una especialidat “que ha contrimostrau estar esencial pa l'atención sanitaria y pa la prevención y promoción d'a salut en a nuestra comarca. La suya enorme repercusión en estes tres anyos s'ha visto reflectada en l'asistencia a este consello, lo mas concorriu en seis anyos”, y ha lamentau que “con esta figura s'han empentau prochectos que se veyerán abocados a la suya perda”.
En a carta, lo Consello de Salut enumera los prochectos en marcha gracias a la plaza de EFYC. 'Reanimando Sobrarbe', endrezau a alumnado dende infantil dica lo zaguer ciclo de primaria, los tallers formativos pa lo personal d'a residencia La Solana, lo programa d'exercicio terapeutico Vivifrail, la prevención de drogodependencias u la Feria de Salut de Sobrarbe son belunas d'ixas actividaz que s'han realizau los zaguers anyos con gran exito d'acullida, tal como confirmaban los profesionals sanitarios presents en a reunión.
En a misiva exposan, igualment, que “tot y con no tener cupo, esta persona tamién realiza una labor asistencial en o centro: actividaz en pool, extraccions, campanyas de vacunación y atras fayenas que puedan surtir (urchencias, citas indemorables, emparo en libranzas de guardias), permitindo que i haiga mas d'un profesional d'enfermería cuan la resta son cubrindo los consultorios locals”, recalcan.
Entre la reunión, estioron muitas las voces que manifestoron la suya disconformidad per no plegar a lo cupo minimo, ya que la Comarca de Sobrarbe aglutina a mas población que la censada oficialment per lo suyo carácter turistico, estando la comarca d'Aragón con mas plazas d'aloch. Tamién se meteba sobre la mesa la dispersión d'a suya población y l'enviellimiento de buena parte d'a mesma, que no puede desplazar-se per los suyos propios meyos y que a ormino ye atendida en as suyas propias casas, fendo que la cantidat de pacients que lo personal sanitario puede atender a lo día sía muito inferior a lo cual s'atiende en as grans urbes.
“Dende lo Consello de Salut transmitimos la nuestra preocupación a lo consellero de Sanidat d'o Gubierno d'Aragón con a esperanza d'o mantenimiento d'a plaza", concluyiba la presidenta d'o Consello “y que consideramos habría d'existir en toz los centros de salut. Lo treballo en promoción y prevención d'a salut ye treballo pa lo futuro”.
