La Dirección Cheneral de Politica Lingüistica d'o Gubierno d'Aragón y lo Chusticia d'Aragón han empentau la publicación d'a versión en aragonés d'o Codigo d'o Dreito Foral d'Aragón, texto que refunde las leis civils aragonesas d'alcuerdo con o Decreto Lechislativo 1/2011, de 22 de marzo, d'o Gubierno d'Aragón, que dentró en vigor lo 23 d'abril de 2011.
Lo director cheneral de Politica Lingüistica d'o Gubierno d'Aragón, José Ignacio López Susín, y lo lugarteniente d'o Chusticia, Javier Hernández, han presentau este luns esta nueva edición en luenga aragonesa, l'idioma oficial d'os Fueros d'Aragón dende lo sieglo XIII a lo XV. D'esta traza, lo dreito aragonés torna asinas a tener una versión en esta luenga quasi seis sieglos dimpués. La zaguera estió la edición d'os Fueros d'os impresors Enrique Botel y Pablo Hurus en 1476, que se considera lo primer cuerpo legal impreso en a Peninsula Iberica y un d'os primers d'Europa.
La edición ha estau levada a cabo per la editorial Atelier, especializada en libros churidicos, que en 2018 ya publicó tamién en aragonés la Constitución espanyola y lo Estatuto d'Aragón, que podrán descargar-se a traviés d'o codigo QR que amaneixe en o “Codigo d’u Dreito Foral d’Aragón”. La traducción ha estau realizada per lo traductor churau Miguel Martínez Tomey, que ha levau a cabo diversas traduccions churidicas a l'aragonés y obtenió en 2020 lo premio Arnal Cavero per la suya traducción d'una obra d'Homero.
Esta edición en aragonés s'enmarca dentro d'a programación organizada con motivo per lo Día Internacional d'a Luenga Materna, que incluye mas de 170 actividatz en 60 localidatz de tot lo país.
Lo Codigo d'o Dreito Foral d'Aragón
Lo Estatuto d'Aragón manifiesta que ye “senya d'identidat” d'a historia d'Aragón lo Dreito Foral, “que se fundamenta en dreitos orichinarios y ye fidel reflecto d'as valors aragonesas de pacto, leyaltat y libertat”. No en vano, Joaquín Costa afirmó tamién que “Aragón se define per lo dreito”.
Las funcions de tutela d'este dreito son las que configuran a lo Chusticia d'Aragón como una institución singular y con perfils muito caracteristicos.
L'ordinamiento churidico aragonés obchecto de tutela ye componiu per lo Dreito Foral d'Aragón, per as leis aprebadas per las Cortz d'Aragón, per las disposicions con fuerza de Lei aprebadas per lo Gubierno d'Aragón per delegación d'as Cortz d'Aragón y per los Reglamentos emanados d'o Gubierno en materias que la suya competencia corresponda al nuestro país.
Lo Decreto Lechislativo 1/2011, de 22 de marzo, d'o Gubierno d'Aragón, aprebó con o titol de Codigo d'o Dreito Foral d'Aragón, esto ye, lo texto refundido d'as leis civils aragonesas, que dentroron en vigor lo 23 d'abril de 2011.
