O Ligallo de Fablans de Zaragoza torna a enchegar a Tronca de Nabidá, rito cristianizau y popular aragonés, an as comunidats aconsiguen que o sol torne a brilar mas, chustament en o solsticio d'hibierno.
Dende o Ligallo de Fablans siñalan que “a tradizión aragonesa replega ritos tan antigos como a Tronca de Nabidá. Un costumbre encara bibo en muitos fogars, an que a fiesta de a Nabidá no s'entiende sin iste auto. A natura biba, o fuego, o fumo, a zenisa, a maxia, a familia, s'achuntan de traza espezial en a Nuei Buena y en os diyas de dimpués. Dende fa trenta añadas Ligallo de Fablans de l'Aragonés ha prebau d'amostrar a cultura tradicional”.
“Á partir de os nobanta, amostramos a tradizión nadalenca por lugars, ziudaz, escuelas y atros puestos an que nos claman. A representazión tiatralizata de o rito de o Tizón de Nabidá tiene que baler ta que a soziedá aragonesa remere u aprenda iste costumbre propio nuestro y lo reproduzca en casa suya, si no con fuego en o fogar, sí con un tizón que reparta os presens de Nabidá. Ya ye prou d'imbasión de chonflos bestius de royo”, remeran dende o Ligallo.
Ta concluir o Ligallo de Fablans diz que “esferens entidaz han contautau en iste cabo d’año 2013 con nusatros t’amostrar a Tronca de Nabidá á os suyos escolanos, sozios u críos de a redolada. O biernes 20 d’abiento en o Colechio Montecanal, sabado 21 d’abiento 12.30 horas Arco Sur, tamién en o Colechio de Baldespartera, o domingo 22 d’abiento a las 12.00 horas en Roseras de a Canal, o martes 24 d’abiento en Aragón Telebisión, o chuebes 26 d’abiento de 17 á 20.30 oras, Guirigay, en o Palacio de Congresos de Uesca, y o biernes 27 d’abiento en Samianigo”.
