Iste anyo, los gualardonaus han estau José Ignacio López Susín, Liena Palacios Rasal y Chan Baos Muñoz. “As suyas vidas han estau intimament ligadas a lo compromís con una luenga viva y digna. Amás d'os premiaus”, senyalan as entidaz.
S'ha quiesto rendir homenache, en o suyo 30 Aniversario “a aquel mitico concierto per l’aragonés, ‘A Ixena’, que organizamos allá per mayo de 1995, con numerosas bandas y personaches publicos que cantoron y recitoron en aragonés, en o escenario d'o Rincón de Goya de Zaragoza”, subrayan. L'acto, a lo cual acudioron mas de 60 personas, contó con a presencia de destacadas personas d'o mundo d'a cultura y a luenga aragonesa, como l’Academia Aragonesa d'a Luenga, Diploma d'Especialización en Filolochía Aragonesa d'a Universidat de Zaragoza, Fundación Gaspar Torrente, Rolde de Estudios Aragoneses, Consello d’a Fabla Aragonesa, Aragón Despierta y Gara d’Edizions.
Como colofón a la entrega d'os premios y l'homenache ‘A Ixena’, s'ha contau con a presencia de Gaiters de Tierra Plana, grupo de mosica tradicional de Uesca que, dende 1998, acompaña a la Comparsa de Chigants, Cabezudos y Caballicos de Uesca. “O concierto d'os gaiters oscenses ha zarrau, como siempre, una emotiva chornada en a cuala compartir mosica, reconoixencias y buens deseyos per nuestra quiesta y menazada luenga”, recalcan.
Os Premios Arredol, organizaus per o Ligallo de Fablans de l'Aragonés y a Fundación Aragonum se celebroron en l'Agrupación Artistica Aragonesa, ubicada en a carrera Mariano Lagasca 23 de Zaragoza. Istes gualardons s'entregan coincidindo con o cabodanyo fundacional d'o Ligallo, que este anyo celebra o suyo 43 Aniversario, y buscan visibilizar “o treballo colectivo y voluntario que mantiene viva la luenga aragonesa frent a la suya actual situación de desprotección institucional”, enfatizan.
“José Ignacio López Susín, avogau zaragozano y figura clau en a politica lingüistica d'Aragón”, ha estau reconoixiu “per o suyo papel alacetal en a creyación y desembolique de marcos institucionals de protección pa l'aragonés”. Participó en a redacción d'o primer anteproyecto d'a Lei de Luengas en 1998, estió miembro d'o Consello Superior d'as Luengas y endrezó la Direccion Cheneral de Politica Lingüistica d’a DChA dica 2023. Amás d'a suya labor institucional, ha estau autor, editor y militant activo en multiples colectivos aragonesistas. “O suyo treballo ha estau siempre discreto pero incansable, con una visión de comunidat y una convicción profunda per la dignificación d'a luenga”, aseguran.
Tamién han recibiu o premio Arredol Liena Palacios Rasal y Chan Baos Muñoz “per a suya labor voluntaria”. Liena Palacios, activa dende los anyos 90, ha ocupau numerosos rols a lo largo d'os anyos en o Ligallo de Fablans de l’Aragonés: presidenta y secretaria d'o Ligallo de Zaragoza, presidenta d'a Federación de Ligallos de Fablans, comparecient en as Corz d’Aragón en esfensa de l'aragonés, impulsora d'a Escuela Nabata y coordinadora d'a biblioteca d'o Ligallo tres decenios. “O suyo treballo ha dixau un sinyal imborrable en a construcción d'alacez culturals en esta asociación”, recalcan. Y Chan Baos, per a suya parti “ha estau una d'as caras visibles mas constants d'o Ligallo”: president de 2011 a 2020, botiguero dende 2004, animador cultural, actor en prochectos escenicos en aragonés y coordinador de numerosos cursos de formación.
