Ligalllo de Fablans de l'Aragonés e Fundación Aragonum han celebrau a entrega d'es Premios Arredol 2026 “uns galardons que reconoixen la labor de personas e entidaz compromesas con a esfensa, promoción e difusión d'a luenga e la cultura aragonesa”.
En ista edición, lo premio t'a proyección social en reconoiximiento t'a esfensa e difusión de l'aragonés, ye recaito en La Orquestina del Fabirol, coincidindo con o 40 aniversario d'a creyación d'ista colla, una d'as formacions más importants d'a mosica tradicional aragonesa. Dende la suya creyación en 1986, la banda ha desembolicau una intensa labor de recuperación, investigación e difusión d'o patrimonio mosical d'Aragón, convertindo-se en una referencia imprescindible ta cuantas cheneracions. Lo suyo compromiso con a cultura popular e con a luenga aragonesa ha contribuito d'una traza decisiva a mantener vivas las nuestras tradicions e amanar-las ta nuevos publicos. Tamién ye important mencionar que La Orquestina ya estió reconoixida por Ligallo de Fablans en os Premios Arredol otorgaus por l'asociación en o ya leixano anyo de 1997. Trenta anyos dimpués, lo grupo de mosica aragonesa contina terne que terne.
Por atro costau, entre es reconoiximientos a lo compromiso u trayectoria asociativa en Fablans, son estaus otorgaus ta Vitoria Rivero e José Luis Mendoza, de conchunta, por a suya dedicación constant e desintresada a lo Ligallo de Fablans de l'Aragonés. Es dos, han feito durant anyos una labor voluntaria fundamental, más que más meyant la organización d'a Tronca de Nadal e la Botiga, actividaz especialment emblematicas e quiestas en l'asociación, amás de colaborar perén en atras iniciativas culturals. Hoc encara, lo segundo reconoiximiento asociativo d'es Premios Arredol 2026 ha distinguiu a Ánchel Cortés, por o suyo compromiso con a difusión d'a realidat lingüistica e cultural aragonesa dende es meyos de comunicación, ha contribuito a dar visibilidat a proyectos, iniciativas e entidaz que treballan por o futuro de l'aragonés.
Es Premios Arredol miran de reconoixer o esfuerzo colectivo, a ormino voluntario e poco visible, de qui contribuye a mantener viva la luenga aragonesa e a fortaleixer o teixiu cultural d'o nuestro país.
“Porque sinse personas e colectivos como La Orquestina del Fabirol, Vitoria Rivero, José Luis Mendoza e Ánchel Cortés, lo camin recorriu por a luenga aragonesa durant las zagueras decadas estaría estau muitismo más difícil”, rematan dende Fablans.
