L’ature puyó en Aragón un 0,59 por cient mientres o pasau mes de marzo

Seguntes os datos ufrius por o Servicio Publico d’Emplego Estatal, Aragón rechistró en o mes de marzo 116.855 personas esqueferadas, 682 mas que no en o mes anterior, o que suposa un 0,59% mas. L’analís d’os datos por redoladas amuestra una baixada en o numero d’esqueferaus en as redoladas de Uesca y Teruel con un -0,10% y un -0,17% respectivament, mientres que en as redoladas de Zaragoza puyó un 0,81%. Por o que fa a os sectors d’actividat puyan totz os sectors. Industria un 0,72%, Construcción un 0,05%, Agricultura un 3,29% y Servicios un 0,34%. Si l’analís d’os datos se …

Foto: Arredol
Foto: Arredol

Seguntes os datos ufrius por o Servicio Publico d’Emplego Estatal, Aragón rechistró en o mes de marzo 116.855 personas esqueferadas, 682 mas que no en o mes anterior, o que suposa un 0,59% mas. L’analís d’os datos por redoladas amuestra una baixada en o numero d’esqueferaus en as redoladas de Uesca y Teruel con un -0,10% y un -0,17% respectivament, mientres que en as redoladas de Zaragoza puyó un 0,81%.

Por o que fa a os sectors d’actividat puyan totz os sectors. Industria un 0,72%, Construcción un 0,05%, Agricultura un 3,29% y Servicios un 0,34%. Si l’analís d’os datos se realiza en función d’o chenero, as mullers rechistroron un aumento d’o 0,37% y os hombres un aumento d’o 0,80%.

Lichera baixada estatal

Como sinyala Arredol, en o computo estatal, o numero de demandants d’emplego a zaguers d’o mes de marzo yera de 5.035.243 personas, 4.979 menos que no o mes anterior. Ista reducción d’o 0,10% ye o primer descenso de l’ature rechistrau en un mes de marzo dende 2008, y contrasta significativament con o dato de 2012, en o qual aumentó en 38.769 personas.

José Luis Soro, president nacional de CHA, considera que “l’apuesta de Rudi ye un fracaso tant estrepitoso que no se maquilla ni con l'emplego temporal vinclau a las zagueras vacanzas. Ni facilitan opcions a qui tienen iniciativas ni treballan ta creyar emplego publico. Istas cifras son a conseqüencia directa d'a politica de Rudi de zarrar o monedero ta cumplir con Madrit encara que ixo embreque deixar de costau a la sociedat aragonesa”.

Ta Soro “ni son capables d'empentar a qui tienen iniciativa, ni son capables de reclamar financiación ta obras publicas y servicios que cheneren emplego publico y dinamicen a economía. Reducen servicios alazetals y quitan becas y aduyas en o momento de mayor necesidat social”.

Puyalón de Cuchas considera “que una d’as claus ta frenar os despius y a constant precarización d'os dreitos laborals consiste en a creyación d'un modelo economico, laboral y social soberano, propio d'as aragonesas, y a o servicio d'a mayoría d'o pueblo aragonés”.

Y ta ixo, un primer trango, ye a exichencia de construyir un Marco Aragonés de Relacions Laborals (MARL), a on sigamos as aragonesas qui sigamos amas d’o nuestro modelo laboral y qué relacions laborals queremos, con una Achencia Tributaria y una Seguridat Social propias. Y amás, con un modelo sindical radicalment distinto a o que nos viene imposau dende l’Estau espanyol, y que hemos padeixiu os zaguers 30 anyos”, sinyalan dende Puyalón.

Por a suya parte, Luis Ángel Romero, portavoz d'Economía y Emplego d’IU en as Cortz d'Aragón, manifiesta a suya “preocupación por a sucesiva y elevada puyada de l'ature en Aragón. Istas cifras dramaticas contrimuestran que as politicas d'o PP-PAR atacan graument a l'emplego que, luen de creyar-lo, lo destruyen diariament y fa que mils de familias sigan as paganas d'una crisi que no han chenerau. Os datos en Aragón son muit preocupants, l'ature contina creixendo y, amás, refleixan, no nomás o fracaso d'a politica de reformas y retalles de Rajoy y de l'ausencia de proposa de Rudi, soque istas midas han estau imposadas sabendo as dolentas conseqüencias que tendrían ta mils de familias”.

Por o que fa a la situación d'a economía aragonesa, Romero remera que “decreixió en 2012 y a previsión ta l'exercicio 2013 y venients continará estando negativa. Isto, uniu a o contino aumento d'o desemplego en Aragón, son dos factors que amuestran clarament que as midas d'o gubierno no funcionan y han d'actuar ta dar a vuelta a las cifras”, Romero demandará a o consellero Bono que explique en as Cortz d'Aragón quála ye a politica cheneral d'o Gubierno d'Aragón en materia economica y d'emplego ta l'exercicio 2013 y venients.

Ta Izquierda Anticapitalista Aragón, “os datos d'o desemplego son catastroficos y a timida baixada a escala estatal en iste mes no fa soque confirmar-lo, se creya poco treballo y precario y se destruye treballo qualificau en a industria y se fa fuera a os chovens ent'a emigración, como resultau d'unas politicas que nomás levan t’a exclusión social d'una gran parte d'a clase treballadera”.

En Aragón amás se contina destruyindo emplego. A situación ye alarmant, amenistamos una reacción imminent con un cambeo radical d'as politicas. Advogamos por aplicar politicas d'austeridat t’os ricos, creyemos que ye urchent un Ingreso Universal Guaranciau alcompanyau d'una nueva cultura solidaria y responsable d'o treballo, reparto d'o treballo, puyada de chornal minimo interprofesional t’os 1.200 €, igualdat de chenero, y un plan d'emplego publico en arias socials y meyoambientals”, explican dende Izan.

Y concluyen, “dende Izquierda Anticapitalista Aragón amostramos o nuestro refuse a qualsiquier valoración positiva por un coyuntural descenso d'o desemplego a ran estatal quan i hai millons de personas sin ingresos (en Aragón son 2/3 d'os esqueferaus), quan i hai millons de treballadors en situación de precariedat, cients de mils de chovens que s'han habiu d'exiliar y millons de chovens sin futuro si no i hai un cambeo radical, ta ixo clamamos a la movilización d'as d'abaixo, a os sindicatos de clase, colectivos, mareas, organizacions politicas ta lanzar una ofensiva social contra iste gubierno y a Troika”.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de nuestra política de cookies, pincha el enlace para más información.

ACEPTAR
Aviso de cookies