Lo diputau de CHA y portavoz adchunto d'o Grupo Plurinacional Sumar, Jorge Pueyo, ha preguntau en a Comisión de Cultura d'o Congreso “per la politica d'emparo a la reconoixencia d'as luengas protechidas per os Estatutos d'Autonomía encara que no tiengan estatus de cooficialidat y, en concreto, per la luenga aragonesa”.
En a suya respuesta a lo diputau aragonés, lo ministro espanyol de Cultura, Ernest Urtasun, ha confirmau que lo Ministerio “ye treballando pa que las obras escritas en aragonés puedan estar galardonadas en as distintas convocatorias d'os Premios Nacionals de l'ambito d'a literatura a partir de 2026”. La medida responde a lo compromiso d'o Ministerio de Cultura “con a protección y promoción d'a diversidat lingüistica d'o Estau en cualsequier espacio de creyación, producción y exhibición cultural”, seguntes ha declarau lo ministro entre la suya comparecencia en a Comisión de Cultura d'o Congreso d'os Diputaus y Diputadas.
Jorge Pueyo ha valorado positivament esta medida, explicando que “l'aragonés, como l'asturiano, son luengas reconoixidas en os suyos Estatutos, son protechidas per la Carta Europea de Luengas Minoritarias y per lo Consello d'Europa y mereixen la reconoixencia y l'emparo d'as institucions. Que la literatura en aragonés pueda optar a los Premios literarios d'o Ministerio de Cultura ye una buena noticia, un paso adebant pa la dignidat d'a nuestra luenga. Sisquiera toz los ministerios tiengan la sensibilidat y la voluntat en favor d'a nuestra pluralidat lingüistica que tiene este ministro de Cultura. Estas medidas d'equiparación con as luengas cooficials permiten a qui treballan per l'aragonés desfender-se frent a lo negacionismo y la ignorancia de PP y Vox en Aragón”, enfatizaba.
Lo diputau de CHA sinyalaba asinas a los ministerios que “encara no han feito los suyos debers: lo Ministerio de Ciencia, que ha d'aprebar la subvención pa l'Academia Aragonesa d'a Luenga, discriminada en estar la sola academia oficial sin emparo estatal, u lo Ministerio d'Educación, que ha de reconoixer, de forma chenerica, la especialidat docent d'aquellas comunidaz autonomas con luenga propia que, sin tener carácter oficial, disposen de protección legal, eliminando asinas las estorbaduras pa que puedan dignificar-se tanto la ensenyanza de l'aragonés y de l'asturiano como lo treballo docent en totas dos luengas”.
L'anunciau per lo ministro Urtasun encaixa en a medida d'o Plan de Dreitos Culturals que replega la “promoción de l'actividat cultural en luengas estatutarias y oficials diferents d'o castellán, asinas como la protección a las entidaz que las promueven frent a intentos de censura u exclusión”.
