Los Nabateros de Sobrarbe abanzan “con paso firme” en a preparación d'as suyas tradicionals actividaz. Lo pasau sabado 12 d'abril, en A Espuña, los miembros de l'asociación levoron a cabo una d'as labors mas simbolicas de l'oficio: retorcer los berdugos, sogas d'orichen vechetal que unirán los troncos d'as nabatas que luego tornarán a surcar lo río Cinca. Una fayena ancestral que requiere tecnica, dedicación y mantiene viva la esencia d'esta antiga forma de transporte fluvial.
A l'atro día, domingo 13, se realizoron treballos de restauración en a nabata exposada en o patio d'armas d'o Castiello de L’Aínsa, dentro d'o proceso de puesta a punto de cara a los actos centrals d'o mes de mayo. En esta intervención ha naixiu una bonica colaboración entre lo Concello de L’Aínsa, Artecor Monegros —entidat ubicada en Alberuela de Tubo— y la propia Asociación de Nabateros de Sobrarbe, “aunando esfuerzos pa resaltar la tradición y lo treballo colectivo”.
Artecor Monegros, an grans profesionals combinan lo saber artesanal con un enfoque inclusivo, ha estau l'encargau de tallar en fusta y colocar en a nabata lo escudo y nombre de l'asociación, con un guiño a las auguas cristalinas d'a Cinca. “Una autentica obra d'arte que ya forma parte d'o paisache nabatero d'o castiello y d'o legado cultural d'a comarca”, aseguran dende l'Asociación Nabateros de Sobrarbe.
Lo momento culminant será lo proximo 17 de mayo, con l'asperau ‘Descenso per lo río Cinca’, entre A Espuña y L’Aínsa. Este anyo, l'evento adquiere una dimensión especial en coincidir con a Trobada Internacional Nabatero, que reunirá a delegacions de trece países. Dimpués d'o descenso, las comitivas desfilarán per las carreras de L’Aínsa en un acto d'achirmanamiento cargau d'emoción y coloriu.
“Somos entusiasmaus con a nueva edición d'o descenso de nabatas, que estianyo nos permitirá compartir la experiencia con nabateros d'atros puestos d'o mundo, a lo mesmo tiempo que acullimos la II Feria Nabatera de Sobrarbe, una oportunidat d'oro pa dar visibilidat y meter en valor a los artesans y a los productors d'a nuestra comarca”, explica Dani Castillón, miembro de l'asociación de Nabateros de Sobrarbe.
“Con cada acto, los nabateros no nomás preservamos una tradición ancestral, sino que empentamos l'intercambio cultural, lo treballo conchunto y la reconoixencia internacional de Sobrarbe y d'esta forma de vida tan ligada a lo río, la tierra y la memoria colectiva”, concluye Castillón, asegurando estar “preparaus y asperando con ilusión” un d'os descensos mas especials d'a suya historia.
