Entidatz, colectivos, sindicatos y partius politicos aragonesistas claman a mobilizar-se iste 23 d’abril, Dia Nacional d’Aragón, en una manifestación en Zaragoza que partirá a las 10:30 horas dende as escaleras d’a DPZ baixo o lema “Aragón ye nazión”. O manifiesto conchunto d’Alezetal, CHA, CUT, EA, FGT, ISTA, PCAR, REA, OSTA, Rebellar y SOA reivindica mayor autogobierno, chusticia economica y a recuperación d’os dreitos historicos.
Conchuntament transmiten a la ciudadanía aragonesa o suyo compromiso de “luitar ta lograr un mayor poder de decisión y con isto poder chestionar y decidir sobre o nuestro futuro”.
Impulsando la “Hacienda Foral aragonesa, que permita chestionar os nuestros propios recursos d’una traza mas eficient y acorde con as nuestras necesidades especificas, reclamando a devolución d’a deuda historica d’o Estau espanyol con Aragón”, subrayan.
Esfendendo y reforzando “uns Servicios Publicos gratuitos que garanticen una sanidat, educación, servicios socials y chusticia de calidat en tot o país, evitando o proceso de privatización que a dreita extrema y a extrema dreita son impulsando, asinas como parar a destrucción d’emplego publico”.
Proponen creyar “una Empresa Publica Aragonesa d’Enerchía, que permita chestionar directament os recursos naturals, baixo control publico, ta evitar a corrupción y o destrozo d’o nuestro país”.
Reivindican mayor autogobierno “ta implantar una Renta Basica y Universal aragonesa que garantice unas condicions de vida dignas ta todas as personas”, asinas como “ta tener un Marco de relacions laborals propio, an incluyan a prevalencia d’os convenios aprebaus en Aragón debant d’os estatals. Consensuar y aconseguir a Carta de Dreitos Socials d’Aragón, ta tener un nuevo modelo social y economico ta o nuestro país”.
Renuevan o suyo compromiso “ta defender as nuestras luengas propias; l’aragonés y o catalán como patrimonio lingüistico y senyas d’a nuestra cultura y identidat como Pueblo”, y construyir “un Aragón solidario, an cabe tot o mundo venga d’an venga, un Aragón sin fronteras, an tota la ciudadanía pueda creyar o suyo prochecto de vida digna”.
Exichen mayor capacidat de decisión politica d’o País aragonés “ta que l’administración aragonesa chestione y implante unas infraestructuras eficients en tot o territorio aragonés, con salida ta Europa per Canfranc, y que vertebre tot o nuestro país”, y tamién “ta defender o nuestro territorio y as nuestras montanyas d’a especulación urbanistica, d’a deforestación, d’os grans parques fotovoltaicos, d’as macrogranjas, d’as multinacionals de centros de datos, d’a implantación d’empresas armamentisticas y aconseguir estar un territorio desmilitarizau, con un compromiso claro por a Cultura de paz y oponernos a cualsiquier tipo de guerra imperialista que atente a soberanía d’os Pueblos, an a clase treballadora mete os muertos”.
A chudicio d’as entidatz aragonesistas, ye necesario mas autogobierno “ta garantizar mediante una Lei aragonesa, que a vivienda siga un dreito fundamental ta que as personas que viven en Aragón puedan tener un techo digno. Creyar un parque publico de vivienda y que o pre d’o alquiler siga controlau por l’administración aragonesa”.
Esfienden mas soberanía politica “ta frenar l’avance d’o faixismo, que mete en periglo a democracia y o nuestro dreito a decidir, dimpués de decadas de sangre, sudor y glarimas”.
“Porque hemos de tener en as nuestras mans lo poder autonomo de decisión suficient ta treballar o futuro d’o nuestro país y as suyas chents”, concluyen.
