No ye a primera vegada que lo escuitamos, tampoco no ye embolicau d'intuir-lo, pero talment nunca no lo heba dito tant claro en una sesión d'as Cortz. Javier Lambán aseguró que "tanimientres siga ell president d'o Gubierno d'Aragón, i habrá una unica luenga oficial, o castellano".
Una expresión que no viene que a corroborar que a muerte de l'aragonés y catalán ye asegurada en Aragón con este president. Asinas lo vaticinan todas y totz os expertos lingüistas y sociologos, que aluden a la "oficialidat" como unica posibilidat d'as luengas minorizadas en l'Estau espanyol.
L'afirmación de Lambán veniba a responder a una pregunta d'o diputau de Vox d'a sesión d'o miercres 27, en relación a la nueva Lei d'eduación Celaá, que no ha contau con consensos politicos ni educativos en Aragón, y que seguntes a suya interpretación destruirá a luenga castellana.
Un president d'Aragón que, a pesar d'haber estau forzau por a legalidat y a democracia d'o Estatuto d'Aragón a aprobar una Lei de Luengas, un Curriculum Educativo y una Academia Aragonesa de la Lengua, no tiene mica intrés en normalizar aragonés y catalán en a vida publica. Tampoco en protecher-lo.
Si nomás i hai un aspecto positivo d'esta mena de declaracions, ye a d'elochiar a evolución que ha sufriu en Aragón o debate lingüistico, a pur de presionar dende os colectivos socials de desfensa d'a luenga, que fuerzan de cabo a quan a medios de comunicación, politicos y os suyos discursos a pronunciar-se sobre iste aspecto. Primero estioron as famosas parolas de Pablo Echenique en oposición a l'oficialidat... dende fa un tiempo tenemos a confirmación de Lambán.
A l'igual que as companyeras asturianas, sabemos que aragonés, igual como asturiano, son dos luengas de segunda en o Estau, y a baralla será larga pa poder revertir-lo.
