La localidat de L’Aínsa ha reeditado este sabado 16 d'aviento lo Punchacubas, la Feria d'o Vin Artesano que dende fa mas de quince anyos plena de vida la suya Plaza Mayor a las puertas de l'hibierno. Con ella se conmemora lo desapareixiu oficio de vinatero en a comarca de Sobrarbe y se degusta la bebida que encara sigue elaborando-se pa consumo propio en numerosos fogars d'o territorio. Se trata d'una chornada festiva en a cuala lo publico local prene lo protagonismo, reuniu arredol d'un elemento indispensable en as fiestas d'hibierno pirenaicas: lo fuego.
En esta edición vinticuatro vinaters de puestos como Mediano, Guaso, Lo Pueyo de Araguás, Banastón y L’Aínsa, asinas como la participación d'un vin procedent de Burdeos, han estau presents en o Punchacubas, concentrando a centenars d'habitants sobrarbenses y turistas en o momento d'a degustación, que prencipiaba amán d'as 19.00 horas. Manimenos, ya dende primeras horas d'o maitín una treintena de voluntarios, entre éls los chefs d'o restaurant Lo Callizo de Aínsa -con Estrela Michelín-, treballaban en a preparación d'a foguera, la minchada y la cena d'a chornada.
La minchada ha consistiu en un 'Recao Montañés' inspirau en la receta de l'afamau y ya feneixiu cocinero binefarense Teodoro Bardají. Los suyos ingredientes mas reconoixibles: las chudías y los jarretes de cordero ecolochicos que han encantau a los comensales. Amás, de primero han preso una esquerola con ajo y mengrana. “Un anyo mas se fa notable lo esprito d'unión y l'empente d'as personas voluntarias, con que lo suyo esfuerzo, sin duda, fan que esta fiesta sía una d'as mas arraigadas en o lugar” explica Amadeo Monedero, coordinador d'os voluntarios y voluntarias.
Posteriorment, la fayena se centraba en quitar adebant la cena y recepcionar los vins d'os productors. En la cena tamién s'ha quiesto mantener la esencia d'a tradición, con un primero consistent en sopas de ajo con pan y uego y un segundo basau en arroz con trunfas y bacalao para arredol de 300 personas. “L'ambient ha estau extraordinario, sosteniu per la climatolochía favorable y ixa participación primordialment local que convierte lo Punchacubas en una fiesta muito nuestra”, apuntaba lo concejal Pep Gracia.
Como cada anyo, los ganadors de 2023 se trían per votación popular, una acción que los presents realizan dende las 19.00 dica las 21.00 horas mientres tienen ocasión de degustar los mencionaus manjares autoctonos y preparar a la brasa los productos que la carnicería La Reja de L’Aínsa ha vendiu entre la nueit. Este anyo lo primer premio ha iu a parar a las mans de Ramón Bellosta de Camporrotuno con trenta y tres votos, muito seguiu de Juan Soro de Cosculluela de Sobrarbe que ha aconseguiu trenta apoyos, y José María Chéliz de Casa Dámaso de L’Aínsa que s'ha quedau con vintisiet. Amás d'os premios previstos, s'entrega lo Jarro d'Honor a bel productor con l'obchectivo de premiar la suya larga trayectoria, y esta vegada la reconoixencia ha estau pa José Antonio Cambra de Abizanda.
Los Mosicos d'o País, procedents d'a Val de Chistau, han tornau a amenizar l'evento a la calor d'o fuego, la millor antesala d'as fiestas hibernals en L’Aínsa. “Las asociacions de El Eco y la de Vinaters de Sobrarbe s'han sumau nuevament a crear un espacio de convivencia extraordinario que s'aspera y se vive cada anyo con especial carinyo”, concluyen dende la Casa del Lugar de L’Ainsa.
