Esta actividat ye organizada per dos prochectos d'innovación docent de competencias transversals d'a Universidat de Zaragoza, PICT 6028 Connectando voces: dialogos plurilingües adintro y difuera de l'aula y PICT 5965 Laboratorio de dreitos culturals y diversidat cultural.
Los graus, másters y doctoraus d'a Universidat de Zaragoza achugan per lo desenrollo de competencias transversals, como l'atención a la diversidat, lo pensamiento critico u lo compromís social, que resultan esencials en a formación universitaria actual “y que consideramos imprescindible visibilizar y enfortir dende la docencia”, subrayan dende la organización d'a chornada.
Dende esta convicción, y con una uellada interdisciplinar, naix esta chornada, concebida como un espacio de dialogo arredol d'a promoción d'a diversidat lingüistica y cultural, tanto en l'ambito educativo como en a sociedat.
Lo programa reune comunicacions sobre y en as tres luengas historicas d'Aragón, aragonés, catalán y castellán, amás d'anglés, arabe y francés, y contará con a participación d'a sociolingüista de prestichio internacional Annete Boudreau (Université de Moncton, Canadá), que clausurará la chornada con una ponencia dedicada a la inseguridat lingüistica y la diversidat cultural (en francés, con sintesi posterior en castellán).
“Tos convidamos a participar en este espacio ubierto de trobada, intercambio y dialogo pa connectar voces, saberes y experiencias arredol d'a diversidat lingüistica y cultural adintro y difuera de l'aula”, concluyen dende la organización, recordando que i hai “dentrada libre dica plenar l'aforo”.
