Madalena
L'asociación cultural Nogará quiere empentar "d’una traza definitiva" a practica d’una tradición aragonesa como la Tronca u Toza de Nadal. "Queremos reivindicar a suya celebración como un elemento propio aragonés, y una traza d’acompanyar la suya puesta en escena con o conoiximiento d’a cultura popular aragonesa, a relación con a naturaleza y a luenga aragonesa", explican.
Nogará denuncian que dende o Gubierno d’Aragón (PP-Vox-PAR) y o Concello de Zaragoza (PP), "son ya masiaus anyos d’oblido d’a riqueza cultural en Aragón". "O curriculum escolar contina trayendo enta las nuestras casas a celebración d’un elemento externo como Santa Claus/Papa Nöel, musica y ritos que nos son allenos", critican pa recordar que "nomás dende l’ilusión voluntaria de AMPAS, mayestros, mayestras y muitos centros escolars se ye revertindo a situación".
"O Concello de Zaragoza, tot y con contar con a programación d’a Tronca, o día 10 d’aviento como solo día, no fació acto de presencia y dixó a decenas de ninos y ninas sin posibilidat de veyer-la. Encara que, ixo sí, la casa lapona de Papa Noël, cuenta dende fa bells anyos, con o refirme y puesta en escena d’o Concello, independienment d’o signo politico", anyade Nogará.
L'asociación cultural se siente "con a responsabilidat, igual como decenas d’asociacions en Zaragoza y Aragón, CEIPs a nivel individual, y cientos de familias en tot Aragón, de trasmitir a ninos, ninas y mayors l’herencio d’esta tradición ancestral". Ye por ixo que nos convidan este viernes, 22 d’aviento, a las 19.00 horas, "a que viengaz con os mas chicorrons d’a casa enta l’espacio Treziclo, a’l canto d’a nuestra asociación" en a carrera Liñán en o vico d'a Madalena de Zaragoza, "a disfrutar d’ista tradición, y de vez d’os villancicos en aragonés de Jesús Sierra". "Una buena ocasión pa practicar y socializar-nos en aragonés", concluyen.
Barrio de Jesús
Tamién i habrá Tronca este viernes en o Barrio Jesús de Zaragoza. Organizada per l'Asociación Vecinal de conchunta con as AMPAS d'o Hilarión Gimeno, Marie Curie y La Purisima y Santo Antonio, la cita ye a partir d'as 12.00 horas en a Plaza Jesús a cargo d'o Centro de Tiempo Libre Rayuela. Convidan a toz los vecins y vecinas "a que vengan de conchunta con os suyos fillos y fillas pa que conoixcan atras formas de celebrar lo Nadal".
Con esta representación d'a Tronca de Nadal 2023 "queremos celebrar la plegada d'o Nadal a lo nuestro vico y dar a conoixer una d'as tradicions que se realizan en muitos d'os lugars d'Aragón". "La Tronca ye una actividat que se relaciona con as y los mas chicorrons d'a casa y que consiste en a realización d'un ritual, con un carácter ludico unindo tres elementos: La Casa entendida como familia, lo Fuego entendiu como elemento purificador y lo Fruto entendiu como suerte u riqueza", explican la AV Barrio de Jesús.
El Gancho
Y lo sabado, 23 d'aviento, la Tronca plegará a lo vico zaragozano d'o Gancho. Dende las 11.00 horas en a Plaza Santo Domingo, l'Asociación Vecinal Lanuza Casco Viello organiza esta tradicional actividat familiar "con muitas sorpresas", dinamizada per los propios vecins y vecinas, endrezada en especial pa los mas chicoz d'o vico.
Amás, l'actividat d'a Tronca sirve pa recibir donacions de chuguez, en buen estau, que se repartirán a los chicoz d'o vico arredol d'o 6 de chinero. Y se podrá donar, tamién, ropa d'abrigo que se distribuye entre la epoca d'hibierno, los sabados, per la Olla Comunitaria Luis Buñuel, en a siede de l'Asociación Vecinal (c/Santo Pablo, 23, local).