Dimpués d'as contundents criticas y los cualificativos de “rata”, “cobarde” u “asesino” entre lo funeral d'estau d'as victimas d'a dana lo pasau mierques 29 d'octubre en a Ciutat de les Arts i les Ciències de Valencia, Carlos Mazón ha presentau la suya dimisión. Dende primeras horas d'o maitín d'este domingo s'especulaba con esta posibilidat, dimpués que la secretaria de Recheneración Institucional d'o Partiu Popular, Cuca Gamarra, hese anunciau que Alberto Núñez Feijóo y Mazón mantendrían una conversación telematica sobre la situación politica a lo País Valenciano.
La decisión s'ha feito publica este luns, en una comparecencia an Mazón, sin cambiar lo guión que sostiene dende fa un anyo, sin emplegar la parola “dimisión” ni aclarir quí será la suya sucesor y lo suyo futuro en o partiu, ha explicau que no seguirá a lo frent d'o Consello y ha apelado a la mayoría parlamentaria, en referencia en Vox, pa triar un nuevo president, descartando asinas la opción de convocar nuevas eslecions. Mazón ha denunciau la campanya “brutal” de qui “ha convertiu en esporte nacional chilar-me asasino”, una campanya que, seguntes lo expresidente, ha teniu como obchectivo “tapar las errors d'as achencias d'o gubierno y quitar reuto politico”. Tamién ha criticau a lo gubierno espanyol per la chestión d'a dana y la carencia d'emparo en a reconstrucción.
Per primera vegada en un anyo, Mazón ha afirmau que ye agora “lo momento de reconoixer las errors propias”. A pareixer suyo, estes han estau “permitir chenerar noticias falsas per no dar explicacions a tiempo”, “no pedir la declaración d'emerchencia nacional perque, seguntes lo gubierno central, esto no permitiría levar mas efectivos” y “mantener l'achenda politica d'o 29 d'octubre”.
Fuents d'o PP valenciano filtroron, en paralelo, que lo sabado s'heba celebrau una trobada d’a dirección autonomica d'o partiu con a presencia de Juan Francisco Pérez Llorca, coordinador d'o grupo parlamentario a las Corz; y Vicent Mompó, Toni Pérez y Marta Barrachina, presidents provincials d'o partiu en Valencia, Alicant y Castelló, respectivament. En aquella trobada s'habría fixau posición sobre qui habría d'estar lo relevo a Mazón, con predilección per Mompó. Per contra, dende la dirección nacional d'a carrera Génova de Madrid, s'achuga per María José Catalá, alcaldesa de Valencia, que no habría acceptau. Una tercera opción, mas probable, sería la d'o mesmo Juan Francisco Pérez Llorca, que asumiría lo cargo interinament dica las proximas eslecions autonomicas. La opción d'un president de transición dica la convocatoria electoral amenestería lo visto bueno de Vox.
Este domingo, a medida que pasaban las horas, la expectación s'incrementaba a las puertas d'o Palau de la Generalitat en a ciudat de Valencia, an se fueron concentrando manifestantes, entre los cuals belunas d'as familias d'as victimas mortals d'a riada d'agora fa un anyo. Rosa Álvarez, presidenta de l'asociación Victimas Mortals d'a Dana 29-O, s'amostró satisfeita per la probable dimisión, pero puntualizó que Mazón “dica lo zaguer momento, d'o cual ha estau charrando y negociante ye sobre lo suyo futuro politico y chudicial, sin importar-le en absoluto las victimas”.
Per la suya parte, Carmina Gil, vicepresidenta de l'asociación, esfendió la dimisión d'o conchunto d'o Consello valenciano: “plegaus dica aquí, toz son igual de culpables”. Cristian Lesaec, president de l'asociación Damnificaus Dana Hortal Sud, recordó que las victimas tamién piden que Mazón sía citau a declarar como investigau en la causa pa determinar la suya responsabilidat. Este luns lo movimiento Alcuerdo Social Valenciano, que aglutina los Comités Locals d'a Emerchencia y la Reconstrucción d'os municipios afectaus, las asociacions de victimas d'a dana, y mas de 200 entidaz socials, civicas y sindicals d'o país, han convocau una concentración a las siet d'a tarde en a plaza d'a Virchen María, pa exichir “verdat, chusticia y reparación” y “honrar la luita” d'a sociedat valenciana.
Lo desenlace s'ha produciu lo mesmo día d'a declaración d'a periodista Maribel Vilaplana debant d'a chuecesa de Catarroja, Nuria Ruiz Tobarra. Citada como testigo pa explicar qué sintió d'as conversacions telefonicas que Mazón teneba con a consellera Salomé Pradas entre la larga minchada de cuatro horas a lo restaurant Lo Ventorro. Los cambios de versions constants y las informacions que en un prencipio s'amagoron son d'interés d'a instructora chudicial de la causa per las 237 muertes.
Noticia orichinal publicada en La Directa.
