La XII Feria d'o Libro Aragonés contará con cuantas presentacions de libros, a cargo siempre de Fabián Biel, antigo responsable d'a biblioteca municipal d'o vico zaragozano de L'Almozara. Tamién i habrá cuentacuentos y actuacions musicals que animarán la chornada.
Diversas editorials aragonesas serán presents en a fiesta d'o libro aragonés, que s'encetará a las 11.00 horas con a presentación de l'asayo "Ana Abarca de Bolea", d'a profesora oscense Ana Giménez Beltrán. Lo libro reivindica la relevancia d'esta escritora d'o sieglo XVII.
A las 11.30 horas se presentará lo "Mapa lingüístico del aragonés", d'o filólogo Alberto García Trell y d'o profesor Javier Martínez Aznar, un libro que documenta l'aragonés como luenga en a vida cutiana d'Aragón. Meya hora mas tarde le tocará lo redolín a lo cómic "Sorpresa", d'a ilustradora Olga Trenc, que ha estau editau en as tres luengas d'Aragón: catalán, aragonés y castellán.
La chornada matinal se zarrará con dos cuentacuentos: "Enzo y la montaña de los sueños", de Pat MM, y "Donde nacen las brujas", de Diana Montañés.
Per la tarde se presentarán cinco libros aragoneses. A las 17.00 horas, "Los moriscos de Calatorao", d'o escritor Isidro Villa. Se trata d'un completo documento sobre lo sinyal que deixoron los moriscos en esta localidat de Val de Xalón. A las 17.30, la novela "El secreto del reino", d'a escritora Cris Bernadó, que describe la vida de Berta d'Aragón, reina efímera per lo suyo matrimonio con o monarca Pedro I, muerto cuatro anyos dimpués d'a suya voda.
A las 18.00 horas se presentará "Los cuadernos del rastro", novela d'o escritor Dimas Vaquero que relata un sorprendent escubrimiento en o rastro de Zaragoza. Meya hora mas tarde, la novela "Arroyuelo", d'o escritor Carlos G. Esteban, que aborda con humor lo conflicto d'a despoblación en un lugar ficticio.
La chornada literaria se zarrará con "La urna", d'o escritor Manuel Valle, un thriller arredol d'un obchecto de ceramica amaneixiu en Sos d'o Rei Catolico.
Lo grupo Franco Deterioro, acompanyau a la bandurria per Mario Sasot, meterá l'animación musical a la XII Feria d'o Libro Aragonés.
