La Directa publica este martes un nuevo caso de espionage d'estau. Esta vegada en os movimientos socials de Lleida entre 2019 y 2021. Seguntes informa lo diario catalán, con a identidat falsa Joan Llobet Garcia, un achent d'a 32.ª promoción d'o Cuerpo Nacional de Policía —naixiu en Teruel— se infiltró, per medio d'o Ateneu Cooperatiu La Baula, en o Sindicat d’Estudiants dels Països Catalans y en Endavant OSAN, totas dos organizacions de l'entorno d'a esquerra independentista.
Dende aquí, Joan tamién habría participau en l'activismo de Lleida a traviés d'a PAH, acudindo a convocatorias contra l'engarcholamiento d'o rapero Pablo Hásel y a atras actividaz d'o movimiento ecolochista.
Este nueva información, sinyada per Ester Fayos, Irene Molina y Jesús Rodríguez, periodistas d'a Directa, se suma a los casos ya destapados de Marc, Dani, Ramon, Maria y Belén. Chunto a lo de Joan son un total de seis achents d'a policía de dos promocions diferents que tienen en común haber estau descubiertos per la Directa.
"Atentan contra l'alacet democratico y de libertat que habría de presidir en tot Estau de dreito"
La organización antirrepresiva catalana Alerta Solidària ha manifestau que “con esta infiltración empecipiamos a acotar l'aconsiga d'a operación global, las suyas lochicas y las suyas interaccions".
"Continamos decindo que no responden a un interés lechitimo u legal d'investigación criminal, sino que atentan contra l'alacet democratico y de libertat que habría de presidir en tot Estau de dreito", anyaden en declaracions a la Directa en as cualas abanzan que ferán un estudeyo churidico d'esta infiltración pa presentar una querella contra l'achent y los suyos superiors.
