Lo Gubierno d'Aragón ha declarau ‘Los Dances en Aragón’ como Bien d'Interés Cultural Immaterial, conforme a la Lei 3/1999, de 10 de marzo, d'o Patrimonio Cultural Aragonés.
Lo patrimonio cultural d'Aragón ye integrau per toz los bienes materials y immaterials relacionaus con a historia y la cultura d'o nuestro país que presienten interés antropolochico, antrópico, historico, artistico, arquitectonico, mobiliario, arqueolochico, paleontolóchico, etnolochico, cientifico, lingüistico, documental, cinematografico, bibliografico u tecnico “haigan estau u no descubiertos y tanto si se troban en a superficie como en o subsuelo u debaixo d'as auguas”, detallan dende lo Gubierno d'Aragón.
Seguntes l'articlo 11 d'a lei, estes bienes pueden estar protechius, en función d'a suya relevancia cultural, como Bien d'Interés Cultural, Bien Catalogado u Bien Inventariado d'o Patrimonio Cultural Aragonés.
L'articlo 12 reserva la cualificación y declaración como Bien d'Interés Cultural pa los bienes mas relevants, materials u immaterials, d'o patrimonio cultural aragonés, concretando en o suyo apartau 4 que los bienes immaterials, entre éls las actividaz tradicionals que contiengan especials elementos constitutivos d'o patrimonio etnolochico d'Aragón, podrán estar declaraus bienes d'interés cultural.
Contino, en o suyo articlo 75, define los bienes etnográficos immaterials como los usos, costumbres, creyacions, comportamientos que trasciendan d'as restas materials en que puedan manifestar-se, prescribindo que serán salvaguardados per l'administración competent.
Per la suya parte, la UNESCO, precisa que lo patrimonio cultural immaterial u “patrimonio vivo” se refiere a “los usos, representacions, expresions, conoixencias y tecnicas, de conchunta con os instrumentos, obchectos, trastes, artefactos y espacios culturals que les son inherents, que las comunidaz, los grupos y en cualques casos los individuos reconoixcan como parte integrante d'o suyo patrimonio cultural”.
Este patrimonio cultural immaterial, que se transmite de cheneración en cheneración, ye recreado constantment per as comunidaz y collas humans en función d'o suyo entorno, la suya interacción con a naturaleza y la suya historia, infundiéndoles un sentimiento d'identidat y continuidat: afavoreix la creyatividat y lo buenpasar social, contribuye a la chestión de l'entorno natural y social y chenera ingresos economicos.
Gran relevancia y vichencia
“Totas las valors que ha de reunir un bien immaterial pa estar declarau Bien d'Interés Cultural se aúnan en os dances d'Aragón per las suyas valors etnolochicas, historicas y immaterials”, aseguran dende la DChA, y anyaden que “lo dance ye una manifestación d'o patrimonio cultural immaterial” d'o nuestro país “de gran relevancia y vichencia, que se celebra anualment en mas d'un centenar de localidaz aragonesas, ocupando un lugar central dentro d'o ciclo festivo”.
Asinasmesmo, la DChA informa que “per resolución d'a directora cheneral de Patrimonio Cultural d'11 de noviembre de 2024 s'acordó encetar un procedimiento y ubrir periodo d'información publica pa la declaración d'os dances en Aragón como Bien d'Interés Cultural Immaterial. En ixe periodo se presentoron alegacions que estioron estimadas parcialment”.
“Dimpués, se solicitó informe a las comisions de patrimonio cultural. La comisión de Uesca informó favorablement la declaración lo 29 d'abril de 2025, la de Zaragoza lo fació en a suya sesión d'o 25 d'abril y la de Teruel, lo pasau 2 de chunyo. En setiembre, per medio de resolución d'a directora cheneral s'ubrió trámite d'audiencia a los interesaus en o procedimiento, si bien no se recibioron mas alegacions”, detallan dende lo Gubierno d'Aragón.
Dende lo gubierno aragonés continan explicando que “lo bien se troba inscrito en o Rechistro Cheneral de Bienes d'Interés Cultural d'o Ministerio de Cultura, con o codigo d'anotación preventiva nº BI0015672. Lo expediente s'ha tramitau conforme a lo previsto en a Lei d'o Patrimonio Cultural Aragonés; la Lei 39/2015, d'1 d'octubre, d'o Procedimiento Administrativo Común d'as Administracions Publicas y la Lei 5/2021, de 29 de chunyo, d'Organización y Rechimen Churidico d'o Sector Publico Autonomico d'Aragón”.
Asinas pues, lo Consello de Gubierno d'o nuestro país “ha dau luz verda esta semana a la declaración de ‘Los Dances en Aragón’ como Bien d'Interés Cultural Immaterial y ha aprebau las medidas de salvaguardia d'os dances, asociadas a la declaración. Como prencipal medida de salvaguardia, se acometerá la identificación, rechistro y documentación d'esta manifestación, chenerando un inventario detallau d'os dances vichents en Aragón”.
Pa ixo “se contará con a participación d'as entidaz locals y lo protagonismo d'a comunidat portadora, representada per los colectivos que son os zaguers responsables d'a recreación y transmisión d'o dance”, aseguran dende lo Gubierno d'Aragón, que, asinasmesmo, explica que “si como resultau d'este proceso participativo de documentación y inventario se detectasen potencials menazas a la transmisión d'este patrimonio immaterial, podrían definir-se y proposar-se medidas de salvaguardia adicionals per parte d'a comunidat portadora”.
Dances en Aragón
Dende la DChA aseguran que “si bien lo termin ‘dance’ ye lo mas utilizau en Aragón pa designar a este tipo de representacions, tamién recibe atras denominacions en función d'a redolada (y dependendo de l'uso mas u menos habitual d'aragonés, catalán u castellán): paloteado, palotiau, paloteao, ball de totxtets, ball de palitrocs. Existen diferents tipos de representacions, en función d'os elementos que contienen en l'actualidat: dances con danzas y representación teatral, aquels que solament contienen parte bailada, paloteaos, palotiaus y paloteados y representacions teatrals sin danzas”, detallan.
Destacan que “en cualques d'estas representacions culle la critica y la censura social, asinas como lo comentario a los escayecimientos colectivos y individuals transcorrius dende la suya zaguera puesta en escena”, subrayan dende la DChA, y aseveran que “l'orichen d'o dance s'ha relacionau, en o caso d'a parte bailada, especialment con as danzas d'espadas, de palos y atras semellants, que s'encargaban pa realzar” cualques manifestacions relichiosas.
Per lo que fa a la parte teatral d'o dance, troba los suyos antecedents tanto en o teatro popular relichioso (autos, misterios, loas) como en atras representacions teatrals encara mas populars y libres, con rasgos parateatrales (entremeses, soldadescas, mojigangas, escarnios de Carnaval).
“En cualsequier caso, la suya popularización tenió muito que veyer con a exaltación d'a ‘piedad’ popular en o sieglo XVII, y como fruto d'esta epoca, lo dance asumiba una triple finalidat: divertir, cohesionar y, sobre tot, adoctrinar a lo pueblo. Como atras manifestacions d'o patrimonio immaterial, ha plegau dica l'actualidat con periodos alternos de crisis, ixuplido y revalorización”, destacan dende lo Gubierno d'Aragón.
Finalment, dende la DChA sinyalan que “la suya pervivencia y transmisión a lo largo d'os sieglos se debe a una gran capacidat d'adaptación a contextos socials cambiantes. Beluns d'os dances desapareixius son en proceso de documentación, investigación y recuperación, en un proceso colectivo y dinamico como la propia fiesta”.
