Lo deputau Jorge Pueyo (CHA), portavoz de Cultura d'o Grupo Parlamentario Plurinacional Sumar, ha presentau una proposición no de lei pa lo suyo debat en a Comisión de Ciencia, Innovación y Universidaz con l'obchectivo que l'Academia Aragonesa d'a Luenga (AAL) reciba financiamiento estatal, como ocurre con a resta d'as academias de luengas d'o Estau, sían cooficials u no.
En a exposición de motivos se recuerda que en os Presupuestos Chenerals d'o Estau de cada anyo se replegan, a cargo d'o Ministerio de Ciencia y Innovación, subvencions nominativas pa gastos de funcionamiento en favor de, entre atras institucions, las distintas academias d'as luengas oficials y no oficials: Institut d’Estudis Catalàns, Real Academia de la Lengua Vasca ‘Euskaltzaindia’, Real Academia Galega, Institut d´Estudis Aranesi-Acadèmia Aranesa dera Lengua Occitana y Academia de la Llingua Asturiana. Asinasmesmo, lo pasau día 7 de mayo lo Consello de Ministros aprebó lo Real Decreto per lo cual se regula la concesión directa de diversas subvencions a entidaz relacionadas con a investigación y lo conoixencia, pa atender lo financiamiento, entre atras entidaz, d'as mencionadas academias lingüisticas entre lo present exercicio.
Dau que l'Academia Aragonesa d'a Luenga ye la sola institución cientifica oficial de luengas protechidas que no conta con ixa subvención estatal, lo deputau de CHA en a coalición Sumar, Jorge Pueyo, ha presentau la siguient proposición no de lei: “Lo Congreso d'os Deputaus insta a lo Gubierno a adoptar las medidas normativas y presupuestarias necesarias pa incorporar a l'Academia Aragonesa d'a Luenga entre las academias lingüisticas receptoras de subvención directa anyal per parte d'o Ministerio de Ciencia, Innovación y Universidaz”.
En a iniciativa se repasa la protección d'as luengas d'Aragón dende lo Estatuto d'Autonomía de 1982, con a devolución de parte d'o autogobierno, asinas como l'aprebación d'una Lei aragonesa de Luengas en 2009 que estió substituyida per unatra en 2013. Tot y con carecer de rango cooficial, no podemos ixuplidar que la Carta Europea d'as Luengas Minoritarias (STCE núm. 148) d'o Consello d'Europa, sinyada en 1992 y ratificada en 2001 per lo Estau espanyol, reconoixe y proteche expresament a l'aragonés y a lo catalán d'Aragón. Per tanto, ye imperativo que lo Estau y lo Gubierno d'Aragón cumplan con os compromisos adquirius con a ratificación y las diversas recomendacions que s'estableixen en los informes de seguimiento anyo dimpués d'anyo.
L'Academia Aragonesa d'a Luenga como institución cientifica oficial en l'ambito d'as luengas y modalidaz lingüisticas propias estió creada en l'articlo 7 d'a Lei 3/2013, de 9 de mayo, d'uso, protección y promoción d'as luengas y modalidaz lingüisticas propias d'Aragón.
