Izquierda Unida d'Aragón expresa “de traza clara y rotunda, lo suyo refuso a la concesión de medallas y distincions que As Corz aragonesas, lo Gubierno d'Aragón y lo Concello de Zaragoza van a atorgar este proximo martes a Leonor de Borbón”.
“Ixas distincions, seguntes l'estableix lo reglamento de concesión d'as mesmas, se dan como acto de reconoixencia d'os méritos d'aquellas personas u institucions que, en l'ambito en o cual son distinguidas, han destacau per los servicios ampraus a la ciudadanía”, sinyala Álvaro Sanz, coordinador cheneral y portavoz Parlamentario de IU.
Tamién, anyade Sanz, “estas distincions tienen per obchecto distinguir a aquellas personas fisicas u churidicas, que haigan amprau servicios excepcionals a Aragón, contribuyiu de traza relevant a la reconoixencia d'a suya identidat u destacau en a defensa d'as suyas institucions y intereses”.
“Tampoco trobamos en o currículo u fuella de servicios d'a cadete Borbón cosa que podamos reconoixer como un servicio a esta tierra, a las suyas institucions, a las suyas chents, a la suya cultura, a lo suyo desembolique social u economico, a la puesta en valor d'o suyo territorio, ni conoixemos una sola propuesta pa amillorar las condicions de vida d'aragoneses y aragonesas, ni pa profundizar en o nuestro autogobierno”, contina lo portavoz de Izquierda Unida Aragón.
IU considera que dar estas distincions “como se van a entregar este martes, ye infravalorarlas, ye meter-las a lo ran d'una dádiva graciosa que, de traza arbitraria, se regala a las amigas”.
No i hai mas que veyer la profundidat d'os argumentos que, en os decretos d'entrega, s'aportan como chustificación d'o mérito.
As Corz, an reside la sobiranía d'o Pueblo aragonés “declaran lo suyo vasallaje” argumentando que ye pa expresar lo “sentimiento de leyaltat y respecto enta la Corona y enta l'ideyal de servicio que esta institución simboliza”. Como puede veyer-se “no i hai garra mérito extraordinario de qui ye distinguida, sino que la medalla ye un acto claro de sumisión y pleitesía, a una monarquía heredera d'una dictadura, que rinden en nombre d'o pueblo aragonés a lo cual no han preguntau”, enfatizan dende IU.
Lo Gubierno d'Aragón, otorgador d'a mas alta distinción aragonesa, se la da perque “s'ha feito merecedora de l'afecto cheneral d'o pueblo aragonés y ha amostrau una especial sensibilidat enta la nuestra tierra”. Mas de lo mesmo. “No i hai mérito d'a princesa, sino que se declara a lo pueblo aragonés un servil aplaudidor”, recalcan.
Lo triplete se completa con o títol de filla adoptiva de Zaragoza “que se le da a Leonor Borbón per deixar constancia de l'afecto d'a princesa per la ciudat y agradeixer la suya vinculación con a ciudat”, y la suya capacidat pa aterrizar con un helicoptero, per seguir l'argumentación de PP y Vox.
Per tot ixo, reitera lo coordinador cheneral de Izquierda Unida Aragón, “expresamos lo nuestro mas profundo refuso a la concesión d'estas distincions que van a estar-le dadas a qui los suyos solos méritos son los de levar un apellido que, amás d'asegurar-le un trono per herencio, le da honors y distincions”.
“No compartimos ixa sumisión de vasallaje que contrimuestran As Corz, lo Gubierno y lo Concello de Zaragoza y reivindicamos lo dreito d'os y las aragonesas a estar ciudadans y ciudadanas en cuenta de súbditos. Per ixo, agora y siempre, nos declaramos republicanos y republicanas y decimos, alto y claro: Entalto la Republica!”, concluye Álvaro Sanz.
Finalment, Izquierda Unida Aragón recuerda que participará “en la marcha republicana a Madrit d'o proximo día 16 de chunyo pa denunciar l'anomalía democratica que suposa tener una monarquía hereditaria y un chefe d'Estau a lo cual dengún puede votar”.
