A lo millor con as leis de luengas que s'han feito en Aragón no se plegará ta un scenario lingüistico y cultural perfecto. A lo millor Aragón tienga en o suyo destín a desaparición cultural. A lo millor Aragón pierda o suyo nombre y a suya idiosincrasia. A lo millor Aragón plege a estar nomás que una remeranza. U a lo millor plegue a desapareixer.
Isto pareixe estar que ye ixo que a cupula d’ista mierda con trazas de piramide quiere y amenista. Isto ye o que pareixe que muita chent quiere y se resigna, ahiere, huei y siempre. Pero huei nomás charramos de luengas. Nomás charramos de cultura. Nomás charramos d'educación. Y pareixe, que baixo iste manto politico y mediatico que ye dencima d’as luengas d’iste país, a parola que trobamos ye miedo. Miedo a lo conoximiento, miedo a o saber, miedo a la investigación, miedo a fablar, miedo a ascuitar, miedo a escribir, miedo a leyer, miedo a pensar, miedo a caminar, miedo a vivir.
Y tamién pareixe, que baixo iste miedo ta bella persona tamién bi ha un atro sentimiento, l’odio. Y antimás un odio sin alazetz. Ye un odio ilochico y que no en tien, de mesura. Ye como un odio a lo diferent.
Ta nusatros una luenga como l’aragonés ye como un auto a on metemos as nuestras asperanzas, deleras, luitas y aimors. Dicir que ye a luenga en a que vivimos sería faltar a la realidat. Pero dende siempre estió a nuestra luenga. Dende siempre vivimos pensando en ella y preixinando que bell diya ascuitaremos a una persona mas que nos diga en a carrera, “buen diya, iste maitin ye a-saber-lo de poliu”. Nunca no entendiemos qual puede estar o problema en fablar una luenga, en conoixer-la y en emplegar-la. Pero bi ha una cosa que nos encarranya a-saber-lo, a negación.
Sinyora, encara no ha naixiu una persona que nos trenque a boca, que nos ature os pietz u que nos talle as mans.
Sinyora isto ye a guerra. No plore, no tremole. Que nomás ye cultura. U ixo pareixe.
Prau | Para AraInfo
Os Prau son: Isa (voz), Dabí (dulzaina, gaita de boto aragonesa y pitos), Dani y Fer (guitarras), Alex (batería), Chabi (bajo)
http://www.myspace.com/enoprau
