Iste sabado 30 de noviembre, si yes en Zaragoza y enchegas o tuyo transistor en o 101.8 d’a freqüencia modulada, qualcosa trucará o tuyo ficacio. Si yes d'as que ascuitas Radio Topo a sobén y conoixes as voces d’as suyas locutoras en sentir-las, ista vegada las trobarás un poquet diferents.
A emisión anyal que Radio Topo organiza de raso en aragonés dende 2011, D’estrela a estrela, plega iste venient sabado en a suya tercera edición y lo fa con más de 15 horas d’emisión por debant y record de participación.
A radio libre zaragozana, que ye celebrando o suyo 20eno cabo d'anyo, prene ista iniciativa por tercer anyada en esfensa de todas as luengas minorizadas como patrimonio d’a humanidat y en concreto de l’aragonés como luenga con mayor risgo de desapareixer de toda Europa.
En as 15 horas d'emisión podrás trobar especials en aragonés d'os programas de Radio Topo El Rocktubernio, El Kantamañas, La Enredadera (A Liedrera), Rueda Libre, El Acorazado Topemkin, El Acratador (L'Acrataire), Skándalo en las ondas, Ciutat Podrida, Lucha Libre y Electrokrazia. Y prou que sí, Fendo Orella en aragonés como siempre.
Antimás d'os programas propios d'a emisora, a ista tercera emisión s’ahiben atras Radios Libres d’a ciudat como La Granja y MAI. Destacar tamién que por primer anyo bi habrá participación internacional, FSK Hamburg encetará a emisión d'iste D'estrela a estrela con o programa Ale-manya.
En ista emisión contaremos tamién con l'alumnalla de 2º ran d'a Escuela d'aragonés Nogará.
En D'estrela a estrela 3 tendremos dende as ueito d'o maitín dica a meya nueit, un meyo de comunicación de tot en aragonés do charrar d'actualidat, de l'orache, d'o mundo, de politica, de mosica, de bicicletas, de luengas... Un meyo de comunicación de tot en aragonés do sentir mosica electronica, folk, hip hop, punk... Y antimás de l'aragonés, igual como l’anyo pasau, tamién bi ha habrá bella horeta t'o catalán.
Si no puedes sintonizar a emisión por a FM d'o tuyo transistor, remera que tamién puedes fer-lo a traviés d'o streaming en a web de Radio Topo.
Un poquet d’historia
O 5 de noviembre de 1992 se sinyaba en Estrasburgo a Carta Europea d’as Luengas Rechionals u Minoritarias, un important tractau por lo que fa a obchectivos t'as luengas sin ran d'oficialidat. Tot y que l'Estau espanyol ha sinyau y ratificau ixa carta, en Aragón continamos tenendo dos luengas propias sin ixe demandau ran d'oficialidat, ye o caso d'aragonés y catalán. Especialment grieu ye o caso d'a primera, a luenga europea con mayor risgo de desapareixer ta cutio.
O prochecto d'una emisión de raso en aragonés en Radio Topo naix d'un d'os suyos programas, Fendo Orella. A propuesta ye acceptada y decamín s'adhiben atros programas d'a emisora ta construir, a zofra, a primera emisión especial de raso en aragonés D'estrela a estrela. A calendata no estió casualidat: o sabado 5 de noviembre de 2011.
En 2012 a participación creix, un total de 14 horas d'emisión. Bi participoron atras Radios Libres d'a ciudat, un mayor numero de programas de Radio Topo fan un poder por estar-ie y mesmo tornó a emitir bell historico programa d'a emisora ya desapareixiu.
Mientras istas tres edicions D'estrela a estrela hemos dau vida a l'aragonés en un meyo de comunicación, fendo-lo servir ta charrar de tot lo que hemos quiesto. Mientras istas tres edicions hemos teniu dos Leis de luengas diferents con identico resultau: que l'aragonés siga en as tres pedretas y a o catalán le nieguen mesmo o nombre.
A imachen que dende 2011 hemos feito servir ye un ababol, por o poliu y feble d'ista flor. Porque encara que dengún no se'n alcuerde d'ellas, quan plega a calor tornan a creixer royas, sin leis y sin demandar-le permiso a dengún. Nos ascuitamos iste sabado 30 en a tercera edición D'estrela a estrela ta continar fendo tranya y emplindo-lo tot d'ababols, y l'anyo venient de seguras que en una quartena.
Fendo Orella | Ta AraInfo
