Las listas de docents de lengua aragonesa “s’han quedau curtas y fa falta que se reubran pa que puedan cubrir-se las baixas”, aseveran dende lo sindicato d’Ensinyanza d’o SOA, que anyade que “lo curso pasau ya se quedon varias sin cubrir ofertando-se como extraordinarias a qui no estaba en listas. Amás la lista de secundaria fa ueito anyos que no se rebarema”.
“L’octubre pasau ya presentamos dos reclamacions per rechistro pero encara no hemos recibiu garra respuesta”, sinyalan dende o sindicato. Per ixo han presentau una queixa a la Chusticia d’Aragón “argumentada normativa y churidicament”.
Una unica queixa “que chunta las dos solicituz antes mencionadas” en as que solicitan que, dende la Chusticia d’Aragón, s’inste a la DChA “a que proceda a la apertura d’a lista de mayestros de Lengua Aragonesa existent en l’actualidat”.
Instan tamien “a la apertura d’a lista de profesors de secundaria de lengua aragonesa existent en l’actualidat”, asinas como “a la baremación d’os méritos de qui componen la lista de profesors de secundaria de lengua aragonesa a día de hue”, asinas como “a cumplir con a rebaremación cada tres anyos como ocurre en totas las especialidaz, a fin de poder subsanar la carencia d’estos profesors y poder cubrir tanto totas las plazas ofertadas como las posibles baixas u incidencias que se puedan producir u se produzcan en a plantilla que figura en a lista actual”, concluyen dende lo SOA.
