La trobada cultural, que tenió lugar lo pasau sabado, 4 de noviembre, en o Frago -Cinco Villas-, tenió como obchectivo compartir conoixencias y fortalecer la comunidat en la luita contra la despoblación. La iniciativa se centró en reforzar la connexión entre dos comunidaz aparentment distants pero unidas per desafíos comuns. Organizau per la Fundación Maria Carta di Carta, l'evento s'enmarca en o prochecto "Freemmos", una iniciativa que busca combatir la despoblación, tanto en nuestro país, Aragón, como en lo país chirmán, la Cerdenya.
La delegación de Baradili, encabezada per l'alcaldesa Maria Anna Camedda y lo suyo adchunto Lino Zedda, estió recibida per los miembros d'o concello d'O Frago y l'asesor cultural, Miguel Martinez-Tomey. En este primer contacto, se compartioron emotivos momentos arredol d'a historia, lo present desafiador y ilusionant de toz dos municipios, asinas como la mosica y lo baile.
La reunión en o concello d'o chicot municipio aragonés permitió confirmar una voluntat común d'acción con a elaboración de programas especificos que se estructurarán per medio de reunions posteriors. Tot ixo precederá a una visita a Baradili d'os administradors d'O Frago pa emparar lo prochecto d'achirmanamiento que se producirá posteriorment con l'emparo d'a Unión Europea.
Lo programa incluyió actividaz ubiertas a la comunidat local, que tenió la oportunidat de participar en dos eventos clau lo sabado. Per lo maitín en o Salón de Plenos, los representants de toz dos municipios ofrioron un saludo conchunto, presentoron la Fundación María Carta y discutioron posibles intervencions.
Per la tarde, los habitants d'O Frago desfrutoron d'a mosica tradicional sarda y admiroron los fermosos trajes que acompanyoron a la delegación. Amás, Lo Frago tamién presentó una actuación de mosica tradicional aragonesa a traviés d'os miembros de l'antiga Ronda y una muestra de jotas y trajes tradicionals per medio d'a intervención d'una vecina d'O Frago , contrimostrando asinas la riqueza d'as suyas propias tradicions locals.
En o mensache de bienvenida a los visitantes de Baradili, O Frago expresó lo suyo compromiso con a preservación d'o suyo patrimonio cultural. La presencia d'a Fondazione Maria Carta y lo suyo prochecto "Freemmos" ye fuent d'inspiración en a comunidat d'O Frago pa continar treballando y mantener vivo lo suyo lugar.
“Esta trobada represienta una oportunidat sola pa aprender, celebrar y fortalecer los lazos entre dos culturas aparentment distintas pero unidas per lo desafío de mantener vivos los suyos lugars. La visita d'a delegación de Baradili ye nomás lo primer paso en un posible programa d'achirmanamiento que s'aspera materializar lo proximo anyo, prometendo beneficios mutuos y un enriquimiento duradero pa totas dos comunidaz”, sinyalan dende O Frago.
