Iste chueves una colla de ciclistas saldrá a fer una gambada muit especial. Será baixo a luz d’a luna plena que iluminará a nueit unatro mes mas. A bicigambada lunar tornará a surcar as carreras y extrarradio de Zaragoza convocada por o Colectivo Pedalea. Iste acto ya se fació o mes pasau en iste anyo, a on una trentena de personas i acudió baixo una luna plena timida que a la fin decició de salir ta goyo d’as presents. En iste caso, se’n fue t’os arredols de Cadrete.
A ideya surtió l’anyo pasau entre o Colectivo Pedalea y Decrecimiento Aragón, como una traza de denunciar l’exceso de luz en as ciudatz y o malfurrie de diners y enerchía que ixo prevoca, amás de fer una agradable gambada de nueitz pedaleyando con, a estar posible, a unica iluminación d’a luz d’a luna. Entre os recorrius feitos, mientres o buen orache, se cuentan os galachos de Chuslivol, a Canal Imperial d’Aragón u o galacho de l’Alfranca. Siempre son recorrius periurbanos, ta aleixar-se prou d’as luces d’a ciudat y poder disfrutar d’o cielo nocturno.
Atra d’as caracteristicas d’istas convocatorias ye que se i leva cena (y si se quiere bebida) ta compartir. Alto u baixo a hora de regreso ye a meyanueit, encara que cada persona puede tornar quan quiera. Iste mes a hora y puesto de quedada será a 21:30 h. en a Pza. Europa de Zaragoza. Ye una convocatoria ubierta a todas as personas. Iste mes tamién i habrá atra luna plena, o viernes 31 d’agosto, diya que tamién se ferá a bicigambada.
Fuent: Arredol
