L'interior d'o Centro Civico L’Almozara de Zaragoza acullirá este proximo domingo 27 d'octubre, dimpués d'a suspensión d'o pasau mes de setiembre a causa d'as plevidas, la XII Feria d'o Libro Aragonés organizada per l'asociación cultural Rebellar.
Presentacions de libros, a cargo de Fabián Biel, antigo responsable d'a biblioteca municipal d'o vico, cuentacuentos y actuacions musicals animarán la chornada, que ubrirá las suyas puertas a las 10 d'o maitín en horario ininterrompiu dica las 20 horas. Cuantas editorials aragonesas serán presents en a fiesta d'o libro aragonés, que s'encetará a las 11.00 horas con a presentación de l'ensayo sobre Ana Abarca de Bolea, d'a profesora oscense Ana Giménez Betrán. Lo libro reivindica la relevancia d'esta escritora d'o sieglo XVII.
A las 11.30 horas se presentará lo “Mapa lingüístico del aragonés”, d'o filólogo Alberto García Trell y d'o profesor Javier Martínez Aznar, un libro que documenta l'aragonés como luenga en a vida cutiana d'Aragón. Meya hora mas tarde le tocará lo redolín a la novela “La urna”, d'o escritor Manuel Valle, un thriller arredol d'un obchecto de ceramica amaneixiu en Sos. La chornada matinal se zarrará con dos cuentacuentos “Enzo y la montaña de los sueños”, de Pat MM, y “Donde nacen las brujas”, de Diana Montañés.
Per la tarde se presentarán cinco libros aragoneses. A las cinco d'a tarde, “Los moriscos de Calatorao”, d'o escritor Isidro Villa. Se trata d'un completo documento sobre lo sinyal que deixoron los moriscos en esta localidat de Val de Xalón. A las cinco y meya, la novela “El secreto del reino”, d'a escritora Cris Bernadó, que describe la vida de Berta d'Aragón, reina efímera per lo suyo matrimonio con o monarca Pedro I, muerto cuatro anyos dimpués d'a suya voda.
A las seis d'a tarde se presentará “Los cuadernos del rastro”, novela d'o escritor Dimas Vaquero que relata un sorprendent escubrimiento en o rastro de Zaragoza. Meya hora mas tarde, la novela “Arroyuelo”, d'o escritor Carlos G. Esteban, que aborda con humor lo conflicto d'a despoblación en un lugar ficticio. La chornada literaria se zarrará con o cómic “Sorpresa”, d'a ilustradora Olga Trenc, que ha estau editau en as tres luengas d'Aragón: catalán, aragonés y castellán.
Pa finalizar, a partir d'as 19.15, Capitán Mundo y Ernesto Cossío meterán l'animación musical y zarre a esta nueva edición d'a Feria d'o Libro Aragonés.
