Dende Ojos Pirenaicos, interpresa coordinadera d'as “actividaz programadas pa la diseminación d'os resultaus obtenius en o prochecto LIFE MIDMACC” desenvuelto en a Comarca d'a Chacetania, s'amuestran satisfeitas dimpués d'a Chornada de Convivencia realizada en Borau este pasau luns 13 de mayo.
“Arredol d'a ganadería y lo sector publico d'o nuestro territorio hemos puesto desfrutar d'unas chornadas de convivencia entre ganaders y responsables de l'administración publica, alcaldes de beluns d'os lugars d'a Comarca d'a Chacetania como Borau u Aisa, ganaders d'as Vals Occidentals y l'entorno de Chaca y los tecnicos y cientificos encargaus de dar a conoixer este prochecto desenvuelto en buena parte en a val d'a Garcipollera, Val d’Aisa y Val de Borau”, destacan dende Ojos Pirenaicos.
La chornada prencipiaba en a Biblioteca Publica de Borau, que ha prestau as suyas instalacions pa lo desembolique d'a chornada. La interpresa de turismo ambiental Ojos Pirenaicos, encargada d'a coordinación y difusión d'estas actividaz, estió la encargada de presentar, con a intervención d'o suyo responsable David Ruiz de Gopegui, la chornada y los suyos obchectivos a traviés d'imáchens y un chicot documental con o cual se podió desfrutar “d'a valor patrimonial y los sinyals que los ganaders d'este territorio deixan en o paisache, con os beneficios que tot ixo conlleva”.
Contino, Estela Nadal y Chabier Zabalza, miembros de l'Instituto Pirenaico d'Ecolochía (IPE) tresladaban los resultaus obtenius en o prochecto MIDMACC, que pretende “dar formulas de chestión d'o paisache pa enfrontinar los desafíos que lo cambio climatico nos presienta en estes tiempos, sobre tot en arias de meya montanya como las que nos trobamos”, sinyalaban.
Dedicacions tan importants como las d'as ganaderas y ganaders “lo present y lo suyo futuro y la mirada mesa en amillorar lo desembolique socioeconomico d'este territorio, nos ha feito desfrutar d'un animau debat que nos ha convidau a la reflexión”, recalcaban.
Emparaus per personal d'a Comarca d'a Chacetania, han estau arredol de 20 las personas participants que “hemos desfrutau d'una chornada en a cuala s'han aconseguiu los obchectivo marcaus dende un prencipio: dar a conoixer y aunar forzas en o que esta investigación ha aconseguiu dar como resultaus chenericos pa lo nuestro territorio, implicar-lo a esta pieza clau que mantiene vivo lo paisache d'o Pireneu: los ganaders”, aseguran dende la organización.
La proxima fita será lo 27 de mayo en a Garcipollera “an podremos desfrutar in situ de as parcelas experimentals an s'han puesto obtener estes resultaus”. En este vinclo puede formalizar-se la participación d'esta proxima trobada.
