ARREDOL | Como atras anyadas, Europa Laica ha prencipiau una campanya informativa sobre a financiación d’a Ilesia Catolica a traviés d’o IRPF. I demandan que a población no marque ni a caixeta d’a Ilesia Catolica ni l’alternativa que diz ir “t’atras fins socials” en a Declaración d’a Renta de 2013. Ta ista organización, “o culto y o clero, o proselitismo relichioso y as campanyas t’alticamar contra leis democraticas y contra la libertat de conciencia que fa la cherarquía catolica, no han d’estar financiadas por l’Estau“, y aclareixen: “Ye decir, por o conchunto d’os contribuyents, catolicos u no pas”.
Tamién remeran que qui no marca garra caixeta decide librement “que ixos diners remaneixcan en as arcas de l’Estau t’atender as necesidatz de totz os ciudadans“. Encara que apuntan que “Atra qüestión y debat politico diferent ye si l’Estau (poders lechislativos y executivos fan u no pas, una adeqüada redistribución d’os diners publicos”.
“As fins socials”, en opinión d’Europa Laica, “no han de pender d’a voluntat mayor u menor cada anyada, d’os contribuyents, sino que han de fer parte d’as politicas publicas, adintro d’os presupuestos de l’estau. L’acción social como dreito, (no pas como caridat), s’ha de financiar de traza dreita por as institucions de l’estau. Si bi ha entidatz privadas que presientan programas especificos de refirme solidario, como ya se fa, que les faciliten financiación dreita dende os presupuestos estatals, nacionals y locals, con os controls publicos adeqüaus.”
Ta rematar, a organización laica denuncia que a Ilesia Catolica ye fendo una campanya ta que se marque a suya caixeta con diners publicos y que a de “fins socials” tamién destina una parte important d’os suyo diners ta organizacions dependients d’a mesma Ilesia.
