Un nuevo Eurobarometro especial, publicau este pasau martes, amuestra que lo 75% d'a población europea reconoixe la importancia d'a economía social pa lo bienestar d'a sociedat. Las organizacions d'a economía social dan prioridat a las personas, las comunidaz y lo meyo ambient y desempeñan un papel crucial a la hora de fer frent a los retos socials.
Una mayoría significativa refirma un mayor emparo a la economía social, en particular per medio de l'emparo a las organizacions d'a economía social (88%), la sensibilización (86%), la ayuda pa crear organizacions d'a economía social (86%) y l'emparo financiero publico directo (80%). Amás, un numero significativo d'europeus y europeas (93%) creye que las empresas “han de guiar-se per las valors d'a economía social, centrando-se en obchectivos socials y medioambientals, redistribuyindo beneficios y operando con estructuras de gobernanza democratica”.
Los resultaus amuestran que la metat d'os europeus y europeas s'han comprometiu con a economía social en os zaguers cinco anyos, cheneralment a traviés d'actividaz como lo voluntariado (18%), las donacions (18%) u como clients (15%). Amás, un de cada tres europeus recibe ayuda d'a economía social en ambitos como la educación, la formación y la vivienda.
La vicepresidenta executiva europea pa los Dreitos Socials y Capacidaz, Empleo de Calidat y Preparación, Roxana Mînzatu, ha declarau que “la economía social forma parte d'a vida cutiana d'os europeus. Da empleo a mas d'11,5 millons de personas y aborda retos socials clau, a lo mesmo tiempo que da prioridat a las personas y a la planeta. Anunciaremos nuevas medidas pa reforzar la economía social europea en a revisión intermedia d'o nuestro plan d'acción lo proximo anyo”.
Puede consultar-se en ubierto la ficha informativa que resume los prencipals resultaus d'a enquesta, y l'informe completo. Tamién s'han publicau fichas informativas con mas detalles per cada Estau miembro.
