Con l'obchectivo de levar los documentals ganadors d'a zaguera edición de Espiello a diversos puntos d'a comarca, lo Festival internacional de documental etnográfico de Sobrarbe organiza este verano la 5ª edición de “Espiello baixo as estrelas”, una propuesta que leva lo cine documental a l'aire libre a diez lugars de ueito concellos.
Cuatro d'as sesions se prochectan en cine dichital en gran formato y pa las seis restantes, en os lugars mas chicoz, plegará un cambión que se convierte en una pantalla de cine. La vecindat se concentra debant d'ella en a plaza d'o lugar y a las diez d'a nueit, cuan las luces d'o día cayen, s'enciende la luz d'o prochector. Se recupera asinas ixa forma d'antes de veyer cine, que amaga dezaga tota la machia y nostalgia d'o cine de verano de tota la vida. Y l'asistencia a las procheccions en as cuatro edicions anteriors contrimuestra que la propuesta fa goyo muito de lo publico de Sobrarbe.
Patricia Español, directora de Espiello, explica que “ir a lo cine siempre ha estau un acto social, pero lo somos perdendo. Lo cine de verano recupera ixe esprito inicial d'ir a veyer una cinta y en acabar, como son horas que ya refresca una micarrona mas, quedar-te con os tuyos vecins y con a persona que viene a presentar la cinta de charrada en a plaza”.
“Con este ciclo hemos visto que la opción de ‘festival extendiu’ funciona muito bien. Lo verano ye una buena epoca pa dar-lo a conoixer a vecins y visitantes y plegar a puestos d'a nuestra comarca an si no estase d'este modo, no i habría una prochección de Espiello. Y per ixo buscamos que sía un cine familiar, pa toz os publicos”, concluye Español.
Como toz los anyos, la programación se tría chunto a los concellos participants, que en esta ocasión son los de L’Ainsa-Sobrarbe, A Fueva, Puertolás, A Espuña, Barcabo, Chistén, Palo y Broto.
Y como no podeba estar d'unatra traza, lo cine feito en Sobrarbe y en o Pirineu tiene un protagonismo especial. Títols ganadors d'os Premios Espiello como An queriemos vivir d'Ana del Rio y Lucia Castillon, Puyuelo de Sara Sarrablo u Tañen Furo de Javier Jiménez, y d'os Premios Espiello Agora x l’aragonés como Luz de setiembre de Lola Gracia u Batimento de Silvia Orós.
Chunto a éls, produccions de carácter local como los curtos Baixando ta escuela, un homenache de toz los colechios de Sobrarbe a la Ronda de Boltaña u Cambia la tuya mirada, realizau per lo taller de teatro social impartiu per Charlotte Bouguet en o Centro Valentia de Boltanya.
Tamién i habrá oportunidat de veyer lo documental promoviu per lo Centro de Servicios Socials d'a Comarca de Sobrarbe pa visibilizar l'important treballo d'as auxiliars d'aduya a domicilio d'o nuestro territorio, Movendo montanyas, endrezau per Sara Sarrablo y enguerau en a XXI edición de Espiello.
Zarra la cartelera lo treballo d'Alfonso Par, ganador d'un d'os premios ASECIC d'o festival, Maa Yiem, la extraordinaria historia de Jordi Sabater, que lo suyo protagonista tamién tenió una gran relación con o Pirineu en os zaguers anyos d'a suya vida.
Amás d'o ciclo ”Espiello baixo as estrelas” lo festival contina con atras actividaz en verano, Per un costau, la exposición producida per Espiello “Una travesía de cine” que incluye los cartels de mas de trenta festivals y muestras de cine repartidas per tot Aragón ye en itinerancia, ha viachiau ya dica Uncastiello y Benás, y en os proximos meses visitará Centenera, Uesca, Quinto d'Ebro y Val d'Algorfa. Per unatro costau, entre lo mes d'agosto torna a Broto la muestra de cine de montanya, Espiellé, que celebrará la suya docena edición.
