Dimpués de que en mayo amaneixese en o BOA as reformas feitas por o "Gubierno d’Aragón"0 en o "curriculum" aragonés d’educación, creyemos que, encara que ye un buen principio, no resolverá os problemas de substitución lingüística, y que cal acompanyar-lo con politicas de conscienciación y socialización a o filo d’as "Luengas Propias d’Aragón".
Somos conscients que sin "politicas d’inmersión" y empente d’istas luengas, no se conseguirá revertir a situación chenerada mientres sieglos de minorización. A "socialización" y emplego d’as "luengas minoritarias" no ye una facultat innata que amaneix de bote y boleyo en a carrera, nomás porque bell par de voluntarios s’encerrinen en ello.
Propuestas como a “parella en aragonés” u estancias de “practica”, son dende fa decadas subvencionadas por institucions locals y autonomicas catalanas y vascas (¡belunas inter-redoladas!). A "educación y l’alfabetización d’adultos" no puede deixar-se a'l costau d’un "voluntarismo" que no’n puede más.
Sabemos d’a experiencia y dificultatz d’ista mena d’educación, mesmo en territorios aon que as luengas minorizadas gozan de refirme economico. A situación social de luengas como l’aragonés y o catalán en Aragón, y a suya evolución, no cal estudiar-la en bells anyos, u asperar os resultaus d’as radidas clases incluyidas en o curriculum d’as Luengas Propias d’Aragón.
Por a experiencia d’atros territorios parellanos a nusatras, con muitas similitutz, ya sabemos os trangos a dar. I hai una ripa d’estudios que saben como enrestir a presión d’una luenga tan potent como o castellano. En os medios de comunicación, en a carrera… u en casa. Tos metemos tres eixemplos con vidios de campanyas encetadas en "Catalunya, Galicia y Gubierno vasco". C.A.V. pa empentar l’emplego d’as suyas luengas minoritarias.
A tamás d’os esfuerzos en educación mientres istos zaguers 30 anyos, l’emplego en a carrera no puya proporcionalmente: En o caso d’o catalán en "Catalunya", mientres que o conoiximiento parlau ye d’o 84,7%, l’emplego d’a parla en casa ye 45% y en a carrera d’o 50%. O reto ye superar os barraches, por eixemplo, pa l’emplego de l’euskera en una población de menors de 20 anyos do o 70% ya sabe euskera.
Una puyada de 50 puntos en 30 anyos fruito d'a ensenyanza. Pero que os trampos d’edat superiors no logran superar o 20% d’emplego en a carrera, y una mica más en o treballo, u en casa. Problemas de socialización que son os grans retos que l’aragonés y o catalán en Aragón habrán d’enrestir, tamién, antis con antis. Tot veyendo a reacción a iste problema en concellos como o de Val d’Echo (PSOE) con a suya nueva pachina (valledehecho.es) sin nian un cenyo a l’aragonés cheso, nian una actividat,… muito nos tememos que ye un tema que cal enrestir de camín.
