Lo suyo títol, y la polida imachen d’a suya portada, obra d’a ilustradora local Rocío Gallardo, no fan burro falso a lo conteniu d’a novela. Asinas, la sinopsi d’a suya contraportada resume la suya trama en pocas palabras: “Clara ye neofablant y treballa d’enfermera. Vive en Barcelona encara que las suyas radices son aragonesas, y suenia con reviscolar-las. Ánchels, naixida de Sant Chuan de Plan, vive a Uesca y fa de caixera en o Bonàrea d’Almudévar. A Clara li fa mover lo suyo deseyo de vivir en un lugar de l’Alto Aragón. Ánchels fuye d’o suyo”.
Demientres 18 meses d’os anyos 2023 y 2024, la novela desenrolla una historia de ficción en a que, con tot y con ixo, i cullen a saber-los “cameos” de puestos y personas reals. I hai aparicions mesmo de bel personache publico prou conoixiu, como aconteixe con lo guardau homenache que la novela fa, comencipiando chusto lo día en que va feneixer, a la querida actriz Laura Gómez Lacueva. Atras sospresas que amaga lo texto son las variadas referencias musicals que i amaneixen u lo chuego entre los dos modelos de lengua presents: l’aragonés común que fa servir Clara y lo tradicional chistabín d’Ánchels.
Pa la dinamizadora cultural y integrant d’o consello de redacción d’a revista Alparcera, Cristina Sánchez Lapetra, que menará la presentación d’o libro en Zaragoza, ye acobaltable la novedat de contar con una novela en aragonés que replega una relación entre dos mullers, que para cuenta en as suyas experencias corporals, y que capta muito bien lo momento actual de movilizacions socials y chent choven fendo un poder pa tornar en os lugars.
Seguntes lo suyo perfil en Instagram, la intención de l’autor yera fer servir la ficción pa prencipiar a fer existir aquello que imachinamos, en iste caso a traviés de “mullers que nos sirvan como referents pa imachinar nuevas y millors maneras de querer-nos”. En zaguerías, nos trobamos debant d’una narración que, igual como se fan os propios personaches a ellas mesmas, planteya un buena pallada de preguntas: l’amor puede con tot?, qué prechuicios y idealizacions tenemos sobre los lugars?, lo sexo ye una cosa transcendent u banal?, qué diferencia i hai entre amor y amistat?, qué parte d’o cuerpo te fa sentir más tu mesma?, cómo querer a distancia?, qué ye la intimidat?
“Entre nusatras” fa lo lumero 17 d’a colección Arto de l’editorial zaragozana Gara d’Edizions. Ye disponible en librerías y en Internet. Félix A. Rivas treballa como etnografo y facilitador de procesos en una cooperativa d’a Economía Solidaria en Aragón. Fa ya trenta anyos va publicar un cuento infantil ilustrau en aragonés y, en castellano, ha feito mas d’una vintena de libros sobre memoria y patrimonio cultural. Ye colaborador d’Arainfo an va empentar l’especial #CuerposNuestros.
Presentación en Zaragoza
En Zaragoza, “Entre nusatras” se presentará lo miércols 22 de chulio a las 19:00 en a sala Ordesa d’a Caja Rural de Aragón (con dentrada por a carrera 4 d’agosto). L’autor i fará la parla con Cristina Sánchez Lapetra, dinamizadora cultural y tamién colaboradora d’Arainfo, y con l’editor Chusé Aragüés.
