Lo cine aragonés tendrá una nueva finestra de difusión en Barcelona con a celebración de ‘Enlucernata’, una chornada dedicada a amostrar diferents produccions audiovisuals aragonesas y acercar a suya cultura cinematografica a o publico d’a capital catalana. A iniciativa ye organizada per a Colla de Charradors O Corrinche y lo Centro Aragonés de Barcelona.
A fita tendrá lugar o sabado 21 de noviembre en os Cinemes Girona de Barcelona y ufierta una programación distribuida en dos sesions, de maitins y de tardes. A muestra se nutre mayoritariament d’una selección d’obras presentadas en o Festival Internacional de Documental Etnográfico de Boltanya - Espiello, una d’as referencías de l’audiovisual vinculado a o territorio y a la cultura aragonesa.
A sesión de maitins incluirá a proyección de quantos curtometraches y d’a cinta Luz de septiembre. As entradas ta ista primera parte d’a chornada ya son disponibles a traviés d’a web d’os Cinemes Girona.
De tardes, o publico podrá asistir a la proyección de 21 palabras. Un capezuto y dos collons. Tamién se pueden mercar as entradas de traza anticipada.
Amás d’as proyeccions, ‘Enlucernata’ contará con espacios de debate y trobada con directors, actors y actrices d’as obras programadas, ufriendo a o publico a oportunidat de conoixer de primera man os procesos creativos y charrar con os suyos protagonistas.
Dende a Colla de Charradors O Corrinche animan a participar en ista chornada cultural y demandan a colaboración ta difundir a convocatoria a traviés de diferents canals, con l’obchectivo de dar visibilidat a o cine aragonés y acercar as suyas produccions a la comunidat aragonesa residente en Barcelona y a o conchunto d’o publico interesau.
Una chornada ta compartir cine, cultura y luengas d’Aragón mas enta allá d’as fronteras d’o nuestro país.
