Fa agora más de dos anyadas que prencipiamos con iste camín d’a cooperativa, uno d’os nuestros obchetivos alazetals yera creyar con iste espacio d’a Flama un puesto an que a chent podese socializar-se en aragonés. Totz os socios charramos ista luenga y somos comprometius dende fa anyos con asociacions u organizacions que luitan por a suya esfensa. Paramos cuenta de que bi heba muita chent en Zaragoza que charraba aragonés, bien porque lo heban aprendiu en bella d’as asociacions que fan clase en a ciudat u porque yera a suya luenga materna y agora yeran vivindo en Zaragoza. Tamien nos trucaba o ficacio, que bi heba chent que encara que no sabese aragonés yera intresada en o tema, pero por contras tamien bi heba chent que estando aragonesa no conoixeban quasi a suya existencia. Alavez, una tabierna yera un puesto de trobada an que a chent que sabese charrar se podese socializar en ista luenga. Y d’atra man como ye un puesto ubierto a o publico en cheneral, yera una buena enchaquia ta que qualsiquier persona que i dentrase podese veyer que l’aragones existe, que ye una luenga viva y en esfinitiva que se puet vivir en aragonés.
Como neofablant d’ista luenga me pareix vergonyoso que o Gubierno d’Aragón quiera reformar l’actual lei de luengas, que ya nos pareixeba muit floixa, porque no cumpliba con as espectativas d’os dreitos que se yeran demandando y por os que se levaba luitando dende feba muitos anyos por parti d’os fablants y d’as asociacions d’esfensa d’a luenga. Con ista lei a lo menos se reconoixeba que l’aragones existiba y yera una luenga, con ista reforma nian ixo. Nomás se considera que ye un conchunto de modalidatz lingüisticas que se charran en a zona pirenaica y prepirenaica d’Aragón. Creigo que ye una traza vergonyosa de desprestichiar y desdignificar l’aragones por parti d’iste gubierno, y creigo que tira por tierra os dreitos d’as personas a vivir en a suya propia luenga dando. por eixemplo, más marguin a la voluntariedat en a demba d’educación.
Pero nusatras no imos a reblar con o nuestro prochecto, amostrando que l’aragones existe, que se puet sentir en a carrera y que ye una luenga que mereixe a mesma dignidat y reconoiximiento que as demás. O mesmo pensamos con o catalán que pareix que a iste gubierno le fa medrana de decir o suyo nombre por qüestiones politicas, pero ye platero que en Aragón se charra aragonés y catalán y hemos de esfender istas luegas porque son a nuestra riqueza cultural. En o nuestro prochecto cooperativo siembre hemos avogau por o multilingüismo, prebando de fer actividatz en diferents luengas, no nomás en aragonés, por eixemplo totz os domingos se fan rufiertas en anglés.
Por ixo como socia-treballadera d’a Flama, que considero un puesto multilingüe, me pareix que ista reforma ye una enrestida contra o multiligüismo y a diversidat cultural, que refusa de raso a riqueza cultural d’a nuestra tierra. As institucions aragonesas habrian de refirmar as luengas minorizadas que se charran en Aragón para asinas guaranciar a suya pervivencia y esdevenidero, ya que istas son patrimonio cultural de todas as aragonesas.
Silvia Cebolla Civil (Socia Cooperativista d’A Flama) | Para AraInfo
