En una chornada cargada de simbolismo, en o Teatro d'as Esquinas de Zaragoza que ha aculliu a mas de 400 asistents, la Universidat de Zaragoza (Unizar) ha celebrau l'acto de presentación d'a Cátedra "María Domínguez" de Memoria Democratica “que ha contau con a presencia d'o ministro de Politica Territorial y Memoria Democratica, Ángel Víctor Torres, asinas como de destacadas figuras de l'ambito academico y institucional”, sinyalan dende Unizar.
L'evento ha estau marcau per l'homenache a lo catedrático d'Historia Contemporania d'a Universidat de Zaragoza, Julián Casanova, reconoixiu per la suya incansable labor en a investigación y divulgación d'a memoria historica, qui ha recibiu una lamina de l'artista aragonés Jorge Gay. “Fa cuasi 40 anyos que enceté un prochecto d'investigación sobre las victimas d'a represión entre la Guerra civil y la posguerra, victimas d'a Guerra Civil y d'o franquismo. Ixo tenió como resultau un primer libro, ‘El pasado oculto’, en o cual dimpués, con atras investigadoras, historiadoras y historiadores, hemos seguiu indagando, espolsando fichers, construyindo una visión libre y rigorosa d'aquel pasau. Per ixo esta reconoixencia l'extiendo a totas las personas que m'han acompanyau en este largo camín, frent a la propaganda y las mentiras” aseveraba Casanova, que incidiba en que “este largo camín ye sobre tot una petición de politicas de restitución pa totas ixas personas que nunca las tenioron, pa totas ixas personas que encara hue son enronadas en paraderos desconoixius, Y un deseyo pa lo futuro: que la investigación, la indagación, no deixe d'estar present, frent a la propaganda y l'uso politico d'a historia”.
En a suya intervención, lo ministro Torres ha subrayau la importancia d'a memoria democratica “como un pilar fundamental pa la construcción d'una sociedat mas chusta y conocedora d'o suyo pasau. Perque la historia y la verdat son los ingredientes fundamentals d'a libertat y la democracia", ha recalcau Torres. “Hemos de treballar duro per recuperar la memoria de María Domínguez y de milars de democratas que sacrificoron la suya vida per nusatros, per la libertat. Los enemigos d'a democracia y las libertaz nos quieren aislaus, desinformados, sin memoria. No lo imos a permitir. Y esta cátedra va a contribuyir a ixo", concluyiba.
Per la suya parte, lo director d'a cátedra, Alberto Sabio, destacaba “lo compromiso d'esta nueva iniciativa academica con a investigación rigurosa y la divulgación d'a memoria historica”, subrayando lo suyo carácter didactico y la suya vocación d'amanar la historia a la ciudadanía. “La iniciativa parte d'a convicción que la memoria historica puede estar mas profitosa y mas inspiradora d'aprendizache si ye verificada y pensada a traviés d'a historia” explicaba Sabio, anyadindo como unatra d'as claus d'esta cátedra “que tiene preferentment una función didactica, pa superar la brecha existent entre la investigación academica y la percepción colectiva d'o pasau”.
Posteriorment, la vicerrectora de Transferencia y Innovación Tecnolochica de Unizar (en funcions) Gloria Cuenca, ha incidiu en a relevancia d'a colaboración entre institucions “pa guarenciar la preservación y lo estudeyo d'a memoria historica”. Cuenca ha estau la encargada entre l'evento de glosar la reconoixencia a lo profesor Julián Casanova per la suya larga trayectoria academica y investigadora. “Esto ye nomás un punto y seguiu. Han estau decenios cargaus de vocación y esfuerzo intelectual pa enchegar linias d'investigación en as cualas ha destacau en gran manera, dica convertir-se en referencia ineludiple”, aseguraba.
L'acto ha estau presentau per l'actor aragonés Joaquín Murillo y ha contau con a prochección d'o documental “María Domínguez. La palabra libre”, endrezau per Vicky Calavia, y l'actuación musical de María José Hernández, acompanyada per Joaquín Pardinilla, imáchens y voz que ha ahondado en l'ambient emotivo y compromeso d'a chornada.
Con esta presentación, la Cátedra "María Domínguez", que naixe pa empentar la investigación y la divulgación en materia de memoria democratica, encieta la suya andadura con un programa ambicioso d'actividaz que incluyirá chornadas didacticas, producción de documentals y la creyación de podcasts dedicaus a figuras clau en a historia democratica d'Aragón y d'o Estau espanyol. Asinasmesmo, s'anunciaba la representación teatral “Los hermanos Machado” en abril y la intervención d'a periodista Nieves Concostrina en setiembre.
La cátedra leva lo nombre de María Domínguez, en homenache a la que fuera la primera muller alcaldesa en a historia democratica d'Aragón y d'o Estau espanyol. Naixida en Pozuelo d'Aragón, Domínguez estió una firme defensora d'a educación y los dreitos socials dica lo suyo fusilamiento en 1936.
