O Festival de Cine y Meyo Ambient Ecozine plega en a suya cinquena edición con un total de 74 cintas que se prochectarán y arrienda actividatz paralelas que se ferán entre os diyas 11 y 18 en a ciudat de Zaragoza.
O lema d’ista anyada ye “O tuyo papel ye más important que no’n esmaixinas”, mirando de ‘concienciar a los ciudadans que o cudiau d’o meyo ambient no ye nomás en mans d’os politicos. Tamién ye en as nuestras mans’, seguntes Pedro Piñeiro, director d’o festival.
Os espacios que acullirán o festival serán os d’anteriors edicions -centro de Historias, a Filmoteca, a Sala Luis Galve de l’Auditorio, o Centro Joaquín Roncal y o Fórum d’a Fnac- y dos espacios nuevos: o centro mosical y artistico Las Armas, a on se ferá a debantadera d’o festival, y o Centro d’urbanismo sostenible.
O padrino d’ista edición será l’activista indichenista Syney Possuel, reconoixiu por a ONU como un d’os diez Heroes d’o dialogo, por a suya esfensa d’o pueblos indichenas de l’Amazonía. Carmen París, d’atra man, será a embaixadora d’a sección de Cine y Augua.
Antimás, mientres a semana que dura o festival, se organizarán actividatz paralelas como charradas, tallers, dentregas de plantas t’a ciudadanalla, exposicions u un mercau agroecolochico en colaboracion con atras entidatz.
Fuent: Arredol
Baixa-te-ne o programa.