Ecolochistas en Acción ha publicau “La ganadería d’o futuro, aquí y agora”, una guía que contiene 30 experiencias reals sobre practicas ganaderas que miran de construyir un modelo mas chusto y ecolochico, y meter en o centro a qui manellan ganaderías sustenibles “con coherencia, compromís y arradigo territorial”.
Esta publicación no incluye un listau completo d’experiencias, sino una selección que mira l’equilibrio cuanto a modelos de manello, territorios y composición social. Naixe con varios obchectivos interconnectaus: inspirar a atras personas ganaderas, informar a la ciudadanía, orientar a las administracions publicas y facilitar lo vinclo entre consumidoras y consumidors con prochectos responsables.
En as suyas pachinas s’exposan historias concretas: ganaderas y ganaders que cosiran lo mont mientres lo corren, que recuperan razas autoctonas, que venden directament a la suya comunidat, que s’organizan en rez y cooperativas, que entienden la suya faina no como una mera actividat economica sino como un servicio ecosocial. En parolas de Nacho Escartín, portavoz d’Ecolochistas en Acción, “personas que han triau un camín mas complexo, pero profundament coherent”.
Pa la organización ecolochista, la transformación d’o sistema agroalimentario no ye nomás un reto tecnico sino un prochecto politico, cultural y comunitario. “Requiere recursos y voluntat, pero tamién reconoixer que la transición ya ye encertando-se. En lugars y territorios diversos, i hai personas que sustienen día con atro un modelo basau en a chusticia social, la salut d’es ecosistemas y lo bienestar animal”, anyade Escartín.
Mosaico d’una transición que ya ye en marcha
Ecolochistas en Acción ha triau 30 experiencias que son, cada una d’ellas, “una contrimuestra viva de que atra manera de producir alimentos existe, ye diversa y funciona; una preba de que la transición enta atro modelo alimentario ya ye en marcha. Estos son beluns d’es eixemplos que amaneixen en a guía:
Ecofes (L’Aínsa, Aragón). Ganadería ecolochica de vacuno de raza pirinenca, adaptada a lo clima y pastos d’o Pirineu, que se comercializa directament a las personas consumidoras.
Pajaretillo (San José del Valle, Cádiz). Ganadería extensiva ecolochica de vacas, con manello rechenerativo que amillora la fertilidat d’a tierra y se comercializa meyant venda directa. En esta finca de 475 ha se chestionan un rabanyo de vacas nodrizas (mestizas: retinta, limousin y fleckvieh) sin fertilizants ni granzaus externos.
La Jara (Arafo, Tenerife). Finca pionera en a producción ecolochica en Canarias, liderada per una muller que pastoreya crabas y ovellas de razas autoctonas. Tamién cría pollos y gallinas a l’aire libre, con un manello rechenerativo d’o paisache y fomentando la sobiranía alimentaria en a isla.
Pasturabosc (Gaüses, Girona). Prochecto de pastoreyo de crabas en paisaches an que contribuyen a la prevención d’incendios y se produce leit ecolochica y quesos artisans, que venden de manera directa y en puntos de venda locals.
Las Lucías (Navatrasierra, Cáceres). Grancha familiar agroecolochica d’ovellas, crabas, vacas y aus de corral, criadas en libertat, en un prochecto que fomenta la biodiversidat y la educación ambiental.
Casa da Fonte (Mañente, Lugo). Grancha de ganadería extensiva y ecolochica de vacas, tocins, pollos y gallinas, que favoreixen suels y pastos, connectan con a vida rural tradicional y la recheneración ambiental.
La publicación d’esta guía s’acompanya d’una mapa interactiva con información basica de cada experiencia.
