Dende Ecolochistas en Acción explican que la visión naixe “como respuesta a la crisi ecolochica y social que trascruza lo sector”, y busca inspirar “la proxima cheneración de politicas d’a UE, situando lo buenpasar d’os océanos y d’as comunidaz costeras” en o centro d'a chestión pesquera. Esta propuesta tiene como prioridat clau l'emparo y lo contacto con as pescadoras y pescadores locals que ya son protagonistas d’este cambio”, sinyalan.
Asinas pues, Ecolochistas en Acción, chunto a un amplio grupo d’actors europeus —entidaz d'o sector pesquero, comercializador, academia y ONG— y baixo lo liderazgo de Seas at Risk y Low Impact Fishers of Europe, presentó lo pasau 12 d’aviento en o Parlamento Europeu la visión ‘Rethink Fisheries’. Esta propuesta sitúa en o centro d’as politicas pesqueras a las comunidaz costeras y l'equilibrio con a naturaleza, priorizando la calidat sobre la cantidat.
La visión subraya que “nomás a traviés d’una transición chusta, enta practicas de baixo impacto, viables economicament y socialment equitativas, se podrán guarenciar océanos saludables y comunidaz prosperas. Pa aconseguir-lo, será necesaria una amplia gama de solucions locals, dende innovacions tecnicas y nuevas artes de pesca dica modelos de negocio, transición enerchetica y chestión participativa, que sirvan como simients d’innovación con potencial pa replicar-se y convertir-se en modelos economicos comuns”, aseguran.
En a presentación, Ecolochistas en Acción remarcó la prioridat d'esta propuesta: emparar y connectar a los pescadores y pescadoras locals que ya son protagonistas d'este cambio. Una transición que exiche, amás, una acción deliberada pa restaurar los ecosistemas, reconfigurar los sistemas alimentarios y priorizar lo consumo humano local y directo.
“La pesca europea se troba en una encrucijada”, afirmó Marta Cavallé, secretaria executiva de Low Impact Fishers of Europe y copresidenta d’o grupo Rethink Fisheries. “A medida que lo mundo trascruza cambios rapidos, tanto ecolochicos como socials, amenestemos una visión compartida de la pesca que nos guíe enta un futuro millor. Este futuro reside en sistemas pesquers de baixo impacto que restauren las funcions d'os ecosistemas, esfiendan la equidad y la chusticia social, y fomenten comunidaz pesqueras locals dinamicas y meyos de vida dignos”.
Lo documento se presentó como una contribución clau pa inspirar los actuals debaz politicos d’a UE, como la futura Lei de l’Océano, la revisión d’a Politica Pesquera Común u la Visión Estratechica pa la Pesca y l’Acuicultura 2040.
En a suya intervención, Cecilia del Castillo, responsable d'o area de Pesca d’Ecolochistas en Acción, concluyió fendo mención a lo Estau espanyol, sinyalando que “lo Gubierno ha d’utilizar totas las ferramientas d’as cualas ya disposa pa empentar con urchencia la transición enta un modelo pesquero chusto y de baixo impacto. Esto implica, per eixemplo, un reparto chusto d'os dreitos de pesca que favoreixca a qui reducen lo suyo impacto y fortalecen las comunidaz locals, asinas como una protección real d’os mars, per medio d’o desembolique y l’apuesta per plans de chestión participativos en os Espacios Marinos Protechius”.
