La plataforma Esfendemos As Luengas asegura que “no ye novedat que un autobús Piribus ambientalista pase por Aragón sin fer garra mención a la luenga aragonesa. En este caso ye la tercera vegada que pasa por territorio aragonés, dimpués de Chaca, Samianigo y agora Uesca”, y denuncia que “este autobús siga subvencionau con os fondos Interreg d'a Unión Europea, que cuente con a presencia de todas as luengas pirinencas, fueras de l'aragonés, y que amás en a suya presentación en a capital oscense, i fesen parte Roberto Cacho, concellero de Meyo Ambient d'o Concello de Uesca -PSOE- y a Directora d'Educación Ambiental y Cambio Climatico d'o Gubierno d'Aragón Marta de Santos -Podemos- sin fer-ne garra mención, ye denunciable de tot”.
Dende Esfendemos As Luengas relatan como “esta zaguera -Marta de Santos- manifestó estar argüellosa de compartir iste espacio natural, ambiental y cultural con atras rechions, anque pareix que a luenga no fa parte de garra cultura”.
Tamién senyalan que “José Andrés Pintado -PSOE-, consellero de Protección Civil y Cambio Climático d'una comarca aragonesoparlant como Plana de Uesca, que tamién i participó, dició formar parte d'os obchectivos d'a Comarca promocionar, visualizar y fomentar a cultura d'o Pirineo y, mas que mas, d'o Prepirineo”.
“Tal y como indicó o suyo coordinador, Pablo Vicente, o prochecto de SEO/BirdLife denominau "ADN PYR" busca explicar a os visitants a identidat d'o Pirineo, ya que tiene como orichen a identidat d'o patrimonio cultural, natural y turistico d'os Pirineos. Ye ixa identidat an que, pa naturalistas y ambientalistas, no tiene cabida la suya luenga de comunicación, l'aragonés”, tamién denunciable a lo suyo chudicio.
Aseguran dende a plataforma que “ye una inercia que venimos observando y padecendo dende fa sieglos, con a que en os zaguers tiempos l'entorno ambientalista tiene como obchectivo asignar a luenga castellana a o territorio pirinenco aragonés. En a exposición han preso parte bellas 65 entidatz d'o rete ‘Educación Pirineos Vivos’, estando este l'encargau d'elaborar os programas educativos con as suyas educadoras ambientales. Plenando os días d'actividatz pa escolars y visitas, entre la suya estancia en a ciudat”.
“Dimpués d'haber partiu de Uesca o 6 de chunyo, o Piribus marchó ta Bordaeaux do remanirá 2 meses, pa dimpués ir ta Tarba, Argelès-Gazost, Bagnères de Bigorre y Louron. Un recorriu que le levará por 32 etapas en tot lo territorio pirinenco: Occitania, Catalunya, Navarra, Andorra y Aragón”, explican.
Y rematan recordando que “ye por ixo que tornamos a demandar a implicación d'a DGPL, a corrección d'o rete ‘Pirineos Vivos’, en ista y en todas exposicions, y a inmediata modificación d'os textos multilingües, folletos y audiovisuals d'o Piribus. No nomás pa que a resta de países pirinencos identifiquen a existencia d'a luenga aragonesa, sino pa correchir sieglos y sieglos de diglosia entre os parladors d'aragonés, que tornan a veyer sin reconoixer a suya milenaria luenga”.